恭喜恭喜!如果攪珠後成功「入圍」,下一步就到明年6月(預計)揀樓喇!但到時嘅具體安排,例如付款手續、揀樓機制同流程係點呢?相信大部分人申請嗰陣都唔清楚,而家就一次過話你知!
如果有幸「中籤」,之後先要通過資產審查,不過之前申請表已經填過,正常來講過關唔難。通過審查後,房委會將向合資格申請人發出「選樓通知書」,申請人必須按指定時間到居屋銷售小組選樓,如果放棄,選樓次序由較後者補上。提一提如果以「家有長者優先選樓計劃」中籤,嗰位長者家庭成員都一定要出席。
▲「家有長者優先選樓計劃」中籤家庭,須與長者家庭成員出席。(資料圖片)
去到會場,申請者會先聽簡介會,然後就入選樓室選購單位,單位會以「先選先得」方式購買,所以準買家記得先做足功課,模擬不同情況,鎖定多個目標,務求喺最短時間內選擇最合心水嘅單位。至於揀樓次序,以比較多人嘅白表為例,順序係「家有長者優先選樓計劃」→其他核心家庭→非核心家庭→一人申請者。由於預計「家有長者優先選樓計劃」會優先選擇晒市區樓王同大單位,制定揀樓策略就要考慮。
當揀到單位後,即日就要畀訂金,所以記得一定要準備好指定金額嘅銀行本票,同帶埋個人支票簿。綠表申請人要準備一張61,000(港元,下同)銀行本票,抬頭寫「香港房屋委員會」,用來支付樓價5%訂金,若所揀單位5%訂金超過61,000元,準買家要即場寫支票繳付餘額。
▲單位會以「先選先得」方式購買,所以準買家記得先做足功課。(資料圖片)
至於白表由於最多只能借9成,所以要準備一張122,000元銀行本票,抬頭一樣寫「香港房屋委員會」,用來支付樓價10%訂金,如果單位嘅10%訂金不止122,000元,亦要即場寫支票繳付餘額。
至於樓價餘款,居屋付款安排類似一手私樓「建築期付款」計劃,買家先落5%(綠表)或10%(白表)訂金,到屋苑落成攞到「入伙紙」後,買家會收到房委會律師寄信通知,要喺指定日期內繳清樓價餘額同完成交樓手續,所以買家唔使心急做按揭。提一提,買居屋買家可以唔請律師,但建議都係自己安排買家律師代表處理,因為房委會律師係唔會為買家提供任何意見同服務,但房委請律師嘅法律費用就要由買方承擔。
▲今期推售4個新居屋,合共提供7,047個單位,當中逾46%都來自粉嶺皇后山的「山麗苑」。
至於最多人擔心嘅按揭,居屋反而好簡單。由於新居屋有政府擔保,而且資產已通過房委會審查,所以銀行一般唔會要求做壓力測試,原則上只要有穩定收入,資料充足合理,就一定可以做到最多「9成25年」按揭,但要留意居屋只能用「P按」,而家息率較H按高,所以銀行拆息幾低都無著數,只有銀行減P(最優惠利率)供款先會減少。
編輯:唐婉琦
接收全方位穩健財富管理資訊,請讚好「健康財富 Wealthy Life」Facebook:https://fb.com/Wealthylifehk/