無綫出招 《衝上雲霄大選》硬撼《全民造星III》決賽

ViuTV選秀真人騷《全民造星III》成功掀起網絡話題，無綫除了開拓新時段播映劇集《香港愛情故事》迎戰外，更在下周六舉行航空界選秀比賽《衝上雲霄大選》，正面對撼《造星III》決賽。

《衝上雲霄大選》15位參賽者昨日會見傳媒，包括曾任飛機師、組合Square前成員李傑志（Brian）、麥明詩緋聞男友盛勁為及劉佩玥師姐朱凱薇等，眾人將在本月26日舉行的比賽中大鬥才能，勝出者可獲現金獎十萬元及試鏡機會。有演藝經驗的李傑志獲睇高一綫，但他反而覺得有包袱︰「我以前係同Square一齊唱歌跳舞，今次以個人身份參賽，打算表演其他項目。」

提到比賽對撼《全民造星III》決賽，Brian笑言不擔心︰「兩個節目都無安排現場觀眾，所以無所謂，亦唔覺得好難應付，始終兩個比賽完全唔同類型。」至於前空姐朱凱薇笑說︰「我覺得自己身形都要再進步，不過據我所知係唔使着三點式嘅。劉佩玥畀咗好多意見我，叫我要淡定同有自信。」

欣宜勁冧小鮮肉ANSONBEAN

另外，前晚一集《全民造星III》中，擔任評判的鄭欣宜相當投入，更對年僅19歲的熱門參賽者陳毅燊（ANSONBEAN）「心心眼」，欣宜大讚對方有魅力︰「見到你笑，我都忍唔住嘴角向上揚，姐姐睇得好開心！」

採訪︰Pauline

攝影︰林良明

編輯︰李潔盈

美術︰梁政敏