曾拍跑山戲無瞓53小時 陳展鵬：阿媽擔心我會死

做藝人，捱更抵夜是常識吧！收26開06（凌晨二時收工，緊接早上六時開工）的通告聽得多，看來要練成一身「無睡意」絕技，才能在娛圈生存。經常拍動作戲的陳展鵬雖然打得，但原來試過太過搏殺，不眠不休兩日，令身體出現警號；女神李佳芯經常捱通宵開工，惟有以各種方法抵抗睡魔。

陳展鵬早年過檔無綫後備受重用，經常劇接劇無得休息，展鵬笑言最高紀錄是連續53小時無瞓過：「11年我同時拍緊《叛徒》同《回到三國》，只可以喺來回兩個拍攝地點嘅時候，爭取時間瞌埋眼唞唞。」他指當時無得瞓之餘，更要拍幾場跑山戲，令他感覺虛脫：「我覺得成個人乾晒，好似無咗靈魂，更加唔好諗有無時間沖涼，呢53個鐘全靠意志先頂到。」

展鵬不想浪費演出機會，盡力頂硬上，一度令身體出現問題：「我曾經睇過醫生，check到肝酵素好低，其實經常捱通宵，一路累積落嚟就搞成咁。」他之後拍《同盟》時亦因太辛苦而「冧廠」，被迫取消通告：「當時我返到屋企，媽咪見我面青青，都擔心我會死，佢即刻煲靚湯畀我飲。」現時的展鵬為了照顧太太單文柔及女兒「小豬比」，變得更加錫身：「以前得30幾歲，體能上仲應付到；依家同自己講盡量唔好捱得咁辛苦，要識得進補同按摩，等自己放鬆下。」

李佳芯：連續2個月捱眼瞓

正忙拍新劇《智能愛(AI)人》的李佳芯（Ali），曾經歷長達兩個月的「唔夠瞓」日子。「嗰排開劇，通告日接夜、夜接日，呢兩個月裏面，每一日只瞓到兩至三個鐘。」Ali笑言睡眠貴精不貴多，惟有在僅有的休息時間內，盡快令自己進入深度睡眠狀態。

至於捱通宵的提神方法，Ali表示：「我覺得眼瞓係心理狀態多啲，開工時盡量搵嘢提神，其實最有效係不停食嘢。其次係搵人吹水，都可以頂到一陣嘅。」

張曦雯：提神全靠韋家雄

備受力捧的張曦雯（Kelly），在《踩過界II》、《白色強人II》擔當要角，但要數捱通宵的經驗，Kelly笑言拍《木棘証人》時最難忘。「有場戲係講我、韋家雄、張文慈同阿謙（羅子溢）四個喺餐廳食嘢，其實我哋拍足30幾個鐘，完全無瞓過，所以埋位時大家個樣都好呆。」她笑言幸好「阿哥」韋家雄仍然在現場大搞氣氛，才令眾人捱過疲倦：「全靠韋家雄不停講嘢引我哋笑，先捱到30幾個鐘。我太眼瞓、太攰反而食唔落嘢，最多都係飲杯熱茶。」

張繼聰︰找中醫調理肝火盛

影視雙棲的張繼聰，試過同一時間開劇兼拍電影：「我好記得當時拍緊《幕後玩家》，同時又開緊電影《八步半喜怒哀樂》，《幕後玩家》其實當時已經趕拍咗幾個月，剩低外景未拍，所以嗰期我拍外景由06拍到18，收工即刻趕去電影埋位，只可以趁搭車同打燈時眠一眠，去到片場已經唔眼瞓，因為回光返照呀嘛！」

阿聰表示長期密集式開工，休息時間太少，對身體造成很大傷害。「我捱得辛苦會出現耳鳴，身體差咗又有肝火，於是去搵中醫調理身體。依家嘅我真係捱唔到，如果唔使開工，我啲生活模式就好似農民咁，好早就去瞓覺。」

採訪︰Pauline

編輯：李潔盈

美術：梁政敏