娛圈外父︳張繼聰囡囡三句令爸爸Homesick 吳彥祖希望寶貝女唔好生得太靚

張繼聰（Louis）同老婆謝安琪（Kay）13年前生咗大仔張瞻，3年前兩人再添寶貝女張靖（Karina），Louis不時喺社交平台曬女，就算囡囡唔再出鏡，Louis都仍然收唔埋佢嘅愛女之情！

Louis疫情下不斷努力接戲搵食，早前佢就去到澳門為開新戲準備，仲要喺當地隔離14日。日前佢喺IG放咗4段錄音，係3歲嘅Karina出冧功令身在外地嘅Louis投晒降，Karina劈頭第一句就嗲到爆問爸爸「點呀……」，唔少人都話佢呢句嘅語調同媽媽Kay一模一樣，之後Karina再「狙擊」爸爸話：「有冇掛住我？」、「陣間發夢見啦！，真係聽到都覺得甜！Louis留言搞笑鬼嚟又有啲慘：「原本心如止水，而家好想返屋企。」Kay都非常佩服囡囡嘅冧功，回應：「厲害，厲害。」

有網民留言指囡囡人細鬼大，唔知遺傳邊個，Louis就得戚咁話:「咁cute , 梗係我啦」，唔少圈中人都讚阿女甜到爆，Louis老友蕭唯展都不禁留言問「點搞」，Louis就借機催佢生B：「好正㗎兄弟，爽手啦！」

古語有云英雄難過美人關，計小編話，英雄難過囡囡關先係真！娛圈中都有唔少老竇都畀囡囡收服，就算平日幾型幾瀟，喺前世情人面前，都只會變成「女兒傻瓜」！

潮人李璨琛近年喺鏡頭前都係有型有款Chok到爆，不過同可愛到爆廠嘅囡囡Lucy相處時，都係一樣投晒降。Lucy媽早前拍片問到Lucy邊個係最靚仔，Lucy毫不猶豫咁答爸爸係最靚仔，媽媽恍然大悟：「難怪爸爸心甘情願被恰到世界那邊端。」

男神吳彥祖2013年喜獲寶貝女Raven更加直指見到囡囡有初戀感覺，指老婆都知佢心裏面有第二個女仔 。吳彥祖指Raven嘴仔似自己，眼似太太，仲話好擔心佢太靚：「每次望都覺得死啦，真係咁靚，仲要腳好長。 」佢講笑話身邊朋友大多生仔，令佢更擔心，表示要教個女打功夫保護自己。

港版李察基爾方中信同老婆莫可欣奉女成婚12年，當年係浪子嘅佢，對住阿女都冇符，「惡唔出樣」：「佢唔怕我呀，我幾大聲幾兇狠鬧佢都冇用，因為佢知我冇料到，睬你都傻。」不過好彩有太太莫可欣做「黑臉」，佢亦覺得唔可以縱壞小朋友，擔心女兒將來有「公主病」。

撰文：黃蘊姿