羅家英自爆 唔再演「唐三藏」原因

羅家英與楊玉梅前晚現身AMM亞洲心動娛樂網台節目《今晚有牌打》，家英哥憶述跟周星馳演出經典電影《國產零零漆》時的趣聞。飾演「達聞西」的家英哥說︰「我一心諗住做科學家，應該都係着西裝，點知着底衫、拖鞋同短褲。當時我真係一萬個唔係咁like，不過當時啱啱出嚟拍電影，所以照做。」家英哥當時用粵劇台步出場，自創對白「力拔山兮氣蓋世」，笑言要「睇你周星馳點死」，怎料周星馳模仿家英哥的粵劇腔讀出下句「時不利兮騅不逝」︰「大家無夾過，星爺真係好叻，觀眾都好鍾意。」

至於在《西遊記》系列扮「唐三藏」唱《Only You》，令觀眾印象難忘，不過家英哥拒絕再演唐僧，他解釋︰「我演唐三藏時已經50歲，再演就60歲，唔睇得，因為唐僧好靚仔，國內大把靚仔，我未必做得番，所以唔做喇！」