連續2年無份爭視帝 陳展鵬睇好劉丹贏王浩信

《萬千星輝頒獎典禮》將於下月10日舉行，有傳無綫為造就王浩信再封視帝，決定抽起陳展鵬主演的重頭劇《唐人街》。陳展鵬昨日坦承已連續兩年無份爭視帝，不過他未有不快，反而睇好劉丹及林峯稱帝。

陳展鵬昨日為新劇《黯夜守護者》試造型，他笑言等足十多年，今次終於與同屬「亞視之友」的袁文傑及陳煒合作，十分開心。有傳展鵬無緣角逐視帝，將缺席頒獎禮抗議，他昨日否認說：「我未收到公司通知（出席），如果公司想我出席，我都會出席支持。（無劇出街唔開心？）咁又無，莫講話觀眾，如果一年幾套劇出街，我都覺得攰，角色又難以發揮，反而呢兩年靜咗，觀眾多啲選擇。」

提到「讓路」給王浩信奪視帝，展鵬說：「梗係唔會，如果你問我，我反而驚丹爺（劉丹）多啲。不過浩信已攞過獎，丹爺同林峯都未攞過，自己會支持未攞過嘅演員奪獎。」另外，展鵬被雜誌拍得與老婆單文柔睇中醫，被傳是想補腎追仔，他笑說：「其實啲相片係疫情前影，當時帶產後嘅太太睇中醫調理身體。」他自言本來短期內不打算再生：「睇完雜誌反而有啲衝動，目前會順其自然，生仔趁呢段時間，怕太遲生，自己無能力同小朋友玩。」

江嘉敏被男友嫌太重

同場的江嘉敏早前上載被男友「公主抱」的照片放閃，她笑指因男友30歲生日，所以出po逗男友開心。她說：「不過影嗰陣NG咗十幾次，男朋友叫我減下肥，睇佢抱起我個樣都有少少猙獰。」已減了十多磅的她笑說：「監製最近剪接《食腦喪B》，話我個頭好似足球咁圓，要剪走部分近鏡。」

採訪︰Pauline

攝影︰林良明

編輯：李潔盈

美術：梁政敏