李香琴離世︳呂良偉呷萬梓良醋爭認做契仔 無綫播《家好月圓》重溫「嫲嫲」演技

「一代西宮」李香琴昨日因病離世，享年88歲，琴姐女兒蕭紫筠昨日接受《東張西望》電話訪問，表示媽媽離世時非常安祥：「10年前佢已經有輕微中風，當時亦有認知障礙症，已經開始唔認得人，亦都有少少柏金遜症，醫生話有呢啲症，情況通常都會退化。約喺一個月前情況突然好差，我哋除咗請工人，仲請咗個『特護』照顧佢，今朝同佢沖咗涼、修埋甲，食緊午飯期間，佢突然定晒、唔吞，又唔瞓覺，姑娘諗住幫佢扣喉，但佢已經無晒知覺。去到醫院，醫生入咗房15分鐘出番嚟，話琴姐送到醫院已經無晒脈搏，瞳孔亦都無打開，話佢已經過咗身。我哋傷心一定有，個個都錫琴姐，但值得安慰嘅係，佢離開時好似瞓著覺咁，好安祥，所以琴姐嘅朋友都唔好咁傷心。」

{{hket:inline-image name="800_07d060b518aad40e5a791a070cc043da_600.jpg"}}{{/hket:inline-image}}

話雖如此，但琴姐的老友們都感到非常不捨，家燕姐早年與琴姐拍下不少「東宮西宮」：「佢好錫我哋，之前探佢見佢都唔錯，仲話得閒有練歌我話請佢去登台，我哋真係好想念、懷念佢，係一個非常好嘅前輩！」

{{hket:inline-image name="800_9ea9e3152ab97eaa8f1d9f4f4eeb0f08_600.jpg"}}{{/hket:inline-image}}

胡楓（修哥）得知消息亦眼泛淚光表示：「個心好唔舒服，好悲痛，一個又一個唔喺到，好傷心，尤其係阿琴，我識咗佢60年有多，阿炳（譚炳文）又係.....咁樣真係唔知點講。阿琴同我合作時多數做一個鍾意我嘅人，佢真係好靚。」姜大衞亦對琴姐離世大感可惜：「我有探過佢，當時佢精神都麻麻，諗唔到咁快。我都有同佢一齊拍戲，真係失去咗一個好好戲嘅人，好可惜。」

{{hket:inline-image name="800_d5c4c44389500887be1a3da880bcc549saasftp20200221_600.jpg"}}{{/hket:inline-image}}

除了一班老友，琴姐亦深得一眾後輩愛戴，曾華倩昨日於社交平台悼念琴姐：「 我非常敬佩的前輩李香琴(琴姐)，今天收到消息她已經遠離疾苦，往生淨土了！需然突然聽到消息很不捨，但是都要堅強面對，去接受！跟琴姐合作做母女，她真的很疼錫我們的後輩，從來沒有架子，還有她在拍攝現場，一定有歡樂。在此，我尊敬的琴姐，祝願你一路走好!永遠懷念妳的，華倩後輩敬上」。

{{hket:inline-image name="67519909gy1gmbt8jvzsoj20sp160nh1.jpg"}}{{/hket:inline-image}}

琴姐「兒女成群」，當年萬梓良當眾斟茶上契認琴姐做契媽，琴姐透露呂良偉知道後很不開心，呷醋自己無份上契，一度飲酒發洩，最後呂良偉亦上契。

萬子在訪問中透露3年前曾探望琴姐：「佢當時根本已經認唔到我係邊個，我內心非常之難過。」萬子當時更跪地叩頭以示尊敬：「我離開時，跪喺度向佢叩頭，亦都係向佢叩別。始終老人家，88歲都係高壽。冇辦法，呢一天終於都會嚟。我喺度……表達……對我契媽琴姐，無限懷念。」

（↓點擊圖片放大↓）

呂良偉回應琴姐離世消息時一度語塞：「契媽走咗真係好愕然、好傷心同埋好唔捨得，因為之前有同佢見面傾偈食飯，佢鍾意同我唱粵曲，講吓以前啲嘢……佢都開心嘅，後來情況就越嚟越差囉。」

為悼念李香琴，翡翠台晚上11時55分第三線劇時段將作特別安排,周五(8日)晚起將重播《溏心風暴之家好月圓》，首三天即周五(8日)、周六(9日)及周日(10日)晚連續播映兩集，而由下周一(11日)起，則回復周一至日每晚播一集。

撰文：黃蘊姿