林子博接騷唔收訂金被臨時飛起 網民「責怪」：做好人都有條界線

新冠肺炎持續肆虐，全球唔少經濟活動都有如「一潭死水」，好多人都因為咁而失業，各行各業都叫苦連天。而會令人群聚集嘅娛樂事業更加係首當其衝。香港喺限聚令下有唔少活動都被逼取消，尋日藝人林子博喺社交平台同大家分享佢嘅不愉快經歷，不過除咗因為疫情之外，仲因為對方辜負咗佢嘅信任。

{{hket:inline-image name="51966414-6ed3-4fc6-a383-40be128873ec_600.jpg"}}{{/hket:inline-image}}

林子博闡述佢尋日被「彈鐘」，而佢更加因為信任對方而冇收訂金，最後「渣都冇」：

​「疫症時期，其實大家都艱難。呢個時候仲有人願意搞活動真係好難得，搵我工作更不勝感激。

所以近年有時啲人搵我做MC，我都唔敢主動收取訂金！因為我怕到時因限聚令，人家搞唔成活動仲要蝕埋訂金畀我，我自己都會過意唔去！

一個月前本來有個活動Mark咗我今個星期六做MC，今日突然話當日唔需要我了，原因係～換咗人！其實最終搵到一個比我更適合嘅人選～我係OK的！只不過可惜嘅係～我因為誠信Hold咗個期畀呢個活動，而推掉同日嘅另一個工作。

不過子博表示佢之後都會繼續唔收訂金，因為佢依然相信「愛」：「可能有人會覺得我點解唔收對方訂金呀？原因係我堅持非常時期係需要大家互相體諒的。尤其過去兩年自身嘅經歷，更令我相信及感受到人間係充滿愛。所以我會堅持大家係應該攜手～共度時艱。願意搵我做嘢嘅，我都係會堅持唔收訂金，最緊要疫情盡快過去，大家活動搞得成，人人有工開先係最重要！」

子博太太上年患癌嘅時候，曾經得到圈中人同唔少網上素未謀面嘅陌生人捐錢襄助，令佢短短4日成功籌集醫藥費，當時令子博大為感動，相信人間有愛。 

（↓點擊圖片放大↓）

有唔少網民都好欣賞佢善良嘅心，但就同時好心痛佢畀人利用呢顆善心，唔太認同佢嘅做法：「做好人都有條界線，保障自己，尤其呢個時期！」、「你真係太好人，但咁樣保障唔到自己。」、「你咁諗人，可惜人哋唔會咁諗！呢個時勢，更加要為自己同仔女著想……下次收訂金啦！」不過有人支持子博堅持自己做法：「支持你做對的事，自己安心又開心，和諧包容，共度時艱。」