【聲明】港生活網站並無進行電話推廣活動

冧莊視帝即娶老婆? 馬明All In靚湯贏女配角

發佈時間: 2021/01/08

《萬千星輝頒獎典禮2020》將於後晚(10日)舉行,視帝后、男女配角等獎項競爭激烈。結果雖未公布,《晴報》先讓多位藝員投選心中得獎人選,候選視帝馬國明揀心水時三心兩意,唯獨選擇「最佳女配角」時,全力支持女友湯洛雯,以報答靚湯開出結婚條件為他瞓身拉票。

今屆視帝之爭相當激烈,《殺手》黎耀祥、《踩過界II》王浩信、《使徒行者3》的苗僑偉(三哥)及林峯位位呼聲高。憑《使徒3》力爭蟬聯視帝的馬國明,獲女友湯洛雯在社交網「出口術」拉票:「既然你哋咁想,如果,我係話如果呀下,佢(馬明)今年冧莊,就結啦!」不過,馬明為《晴報》揀選視帝時竟無自己份,只「貪心」地表示睇好三哥、林峯和袁偉豪。但選擇「最佳女配角」時,馬明毫不猶豫選擇女友:「一定係湯洛雯!」證明對女友一條心。

看回視帝之爭,突破年齡界限、為《殺手》狂操一排朱古力的黎耀祥,以血汗贏獲得龔嘉欣、張振朗、羅天宇及陳煒等力撑第四度封帝。嘉欣曾大讚祥仔的專業精神:「有場戲祥哥拍到身水身汗、膝頭都腫晒,我等緊埋位食薯條,見佢一句怨言都無,坐埋一邊飲水。」至於王浩信及三哥則有《踩過界II》及《使徒3》的好拍檔支持;《愛.回家之開心速遞》的「根叔」劉丹亦有機會,他開口表明恨攞獎,未知能否一嘗視帝滋味。

《殺手》龔嘉欣挑戰視后寶座

視后方面,眾女鬥得難分難解,在《殺手》飾演「Dark Angel」的龔嘉欣,剷青的性感造型與平日甜姐兒形象極大反差,動作連場又有內心戲,難怪得到好拍檔羅天宇、陳敏之及戴祖儀力撑,嘉欣亦投自己一票:「好多觀眾支持同鼓勵我,第一次提名女主角,都係平常心。」嘉欣又說:「拍《殺手》真係好辛苦,留低好多後遺症。」至於《使徒3》「Madam G」黃智雯及《踩過界II》「癲姐」蔡思貝,同獲睇高一綫,她們亦對自己投下信心一票。

「大小姐」賴慰玲女配有望

演藝學院畢業的賴慰玲,一早獲黃秋生大讚演技好,更封她為「小鄭裕玲」,亦是蔡思貝、張振朗及陳煒心目中的最佳女配角。賴慰玲在《反黑路人甲》演大小姐,強悍得來又有脆弱一面,在七位女角中極為搶鏡。前輩級人馬龔慈恩在《香港愛情故事》中與白彪經歷感情危機,與女兒王敏奕的一場和解戲,相當催淚。取代黃心穎演出《法證先鋒IV》的湯洛雯,雖然獲男友馬明加持,但似乎亦難敵兩位對手。

徐榮鬥林景程爭男配

最佳男配角方面,徐榮在《反黑路人甲》演金牌打手「喪鐘」,性格夠癲夠惡,卻又帶點「蠢蠢哋」,令觀眾又愛又恨,馬明、張振朗及龔嘉欣均睇好他奪獎。在《香港愛情故事》飾演地產經紀的林景程,神情對白抵死又搞笑,成功搶鏡的他獲黃智雯、袁偉豪及劉佩玥支持。林景程謙稱不敢投自己一票,反而讚《殺手》奸角謝東閔表現出色。景程說:「好感激同事支持我,我會好好享受頒獎禮嘅氣氛。」

採訪︰Pauline

編輯:李潔盈

美術:梁政敏

冧莊視帝即娶老婆? 馬明All In靚湯贏女配角

龔嘉欣入行13年,終於角逐最佳女主角。

冧莊視帝即娶老婆? 馬明All In靚湯贏女配角

黃智雯曾多次提名視后,可惜失落而回。

冧莊視帝即娶老婆? 馬明All In靚湯贏女配角

徐榮演惡霸入型入格。

冧莊視帝即娶老婆? 馬明All In靚湯贏女配角

網民大讚林景程演地產經紀妙語連珠。

冧莊視帝即娶老婆? 馬明All In靚湯贏女配角

飾演黑幫大家姐的賴慰玲,演技相當細膩。