【聲明】港生活網站並無進行電話推廣活動

復康會協康會義賣揮春利市封 支援復康及幼兒教育服務

發佈時間: 2021/01/11

牛年就快到喇,黛安收到風,香港復康會同協康會今年分別推出咗「自家製」嘅利市封同揮春,其中香港復康會義賣活動籌得嘅善款,將用嚟向弱勢社群提供復康服務;協康會就會將收益用嚟支持該會嘅幼兒教育服務。

香港復康會嘅利市封同揮春主要係由殘疾人士、長期病患者同照顧者設計,黛安知道,佢哋推出咗「結伴同行福袋」套裝,內有牛氣沖天利市封1套,同時附上由鴻福堂贊助嘅金腿瑤柱蘿蔔糕禮券或鴻運椰糖年糕禮券1張,以及Laager精選南非國寶茶1盒㗎。即日起至下月4日前,大家可以喺佢哋旗下社企營康薈網店或指定網店買到賀年禮品,今個星期五(15日)前買任何產品仲有9折早鳥優惠。

至於協康會嘅利市封同揮春,就以上海總會康苗幼稚園學生繪畫嘅插畫作設計,題材包括學童鍾意嘅人物、動物同快樂嘅事物,可愛又充滿童真。利市封及揮春以單獨或慈善套裝形式發售,即日起可登入協康會嘅網上商店訂購。姊妹仲話,今個星期五前幫襯佢哋網店買書,會有85折優惠,折實價買夠$200更可獲贈1款20個慈善利市封㖭!

復康會協康會義賣揮春利市封 支援復康及幼兒教育服務

協康會揮春利市封套裝。

復康會協康會義賣揮春利市封 支援復康及幼兒教育服務

香港復康會牛運亨通揮春套裝。

撰文: 黛安 消息特靈八卦公關
欄名: 八卦名利場