無綫《萬千星輝頒獎典禮2020》昨晚圓滿結束，《踩過界II》王浩信以「盲俠」一角第二度封帝，兼贏得大馬視帝連中兩元；蔡思貝亦憑《踩過界II》「癲姐」首度稱后。
王浩信昨晚擊敗《殺手》黎耀祥及《使徒行者3》林峯等人封帝，特地趕回港領獎的他在台上激罕感謝太太陳自瑤︰「多謝YoYo（陳自瑤），多謝你非常悉心照顧個女！」但台下的陳自瑤竟然黑面，事後她解釋只是分心。視后方面，蔡思貝力壓《使徒3》黃智雯得獎，思貝說︰「三年前第一次獲『我最喜愛電視女角色』，我喺台上講過連自己都唔鍾意自己，三年來自己成長同經歷咗唔少！」而《反黑路人甲》榮獲最佳劇集等多個獎項，加上大馬「最佳劇集」，合共七個大獎成為大贏家。
白彪致辭唔肯落台
賽前大熱龔嘉欣雖然失落台慶視后，但憑《香港愛情故事》得「最受歡迎電視女角色」，以及憑《殺手》贏得大馬視后。張振朗由去年「飛躍進步男藝員」成功升呢，憑《反黑路人甲》高彬一角獲「最受歡迎電視男角色」，他眼濕濕稱︰「希望明年感染多啲身邊人鍾意演戲！」
至於《反黑路人甲》賴慰玲奪「最佳女配角」，她感謝恩師羅冠蘭︰「你成日覺得恨鐵不成鋼，不過都介紹我去面試《女人俱樂部》！」白彪憑《香港愛情故事》市井老竇「大聲公」拿下最佳男配角，他致謝辭講足幾分鐘，更自嘲︰「今次唔係白彪，係奪標！」最後要司儀鄭裕玲出手邀請他落台。昨晚頒獎禮安排致敬環節，由胡定欣唱《明星》悼念離世的李香琴、譚炳文及曾偉權等多位演藝人。此外，汪明荃昨晚在台上為同事們爭取加薪︰「如果環境好啲，疫情退咗之後，TVB可唔可以加少少人工畀我哋，鼓勵一下大家！」台上藝員齊齊拍手叫好。
採訪︰Pauline
撰文︰Steven、Pat
攝影（部分）︰林良明
編輯︰李潔盈
美術︰鄧建威、梁政敏