《萬千星輝頒獎典禮2020》尋晚完滿結束，往年都係視帝、視后兩個得獎者最搶Fo，不過今年嘅討論就幾乎落晒喺「視帝嫂」王浩信老婆陳自瑤（Yoyo）身上，事關王浩信發表得獎感言講到多謝「屋企人」Yoyo時，Yoyo嘅表情非常「耐人尋味」！
有別於一般「老婆」嘅感動反應，Yoyo表情僵硬，甚至好似冷笑緊一樣，令二人已經離婚嘅傳聞再次炒熱！有網民翻出多年嚟歌、影、視界別嘅男士喺台上同老婆講多謝嘅得獎感言片段，大部分都睇到人熱淚盈眶，同Yoyo呢個表情真係相映成趣！
其中劉青雲嘅「太空論」就最為人津津樂道，2014年劉青雲憑《竊聽風雲3》於第34屆電影金像獎獲得最佳男主角，佢向同為演員嘅太太郭藹明道謝，幾度哽咽講：「每次當我揸住太空船，飛到宇宙唔知邊度，你總有辦法令我安全返地球」，喺台下嘅郭藹明一邊甜笑，斗大嘅淚珠一邊落下，當年真係整喊唔少姨媽姑姐。
而許志安2001年喺十大勁歌金曲頒獎典禮上首次奪得「最受歡迎男歌手」獎嘅「廚房宣言」都成為咗一時佳話。許志安當年喺台上泣不成聲講出心底話：「我曾經喺佢廚房度講：『如果有一天你拎女歌星獎，我拎男歌星獎就好喇』，佢同我講，你畀心機啦，你相信自己就得，我估唔到今日……好多謝你。」台下嘅鄭秀文被影到淚如雨下，最後仲喊到衝埋入後台。
2010年，謝霆鋒憑電影《綫人》奪得第30屆香港電影金像獎最佳男主角，一宣布霆鋒得獎時，佢當時嘅太太張栢芝已經喊到好激動，喺台上霆鋒就Chok住咁多謝老婆：「我好多謝我太太今日陪我嚟，By the way you look beautiful tonight, not just tonight, but especially tonight.」搞到栢芝喊到青筋都現埋。
另一位出名係愛妻號嘅張家輝，2009年憑電影《証人》奪得第28屆香港電影金像獎最佳男主角，佢喺台上輕描淡寫咁多謝老婆關詠荷：「多謝我嘅太太，佢照顧得我小朋友好好，令到我可以安心工作。」家輝多謝老婆嘅內容同王浩信差唔多，不過關詠荷就喺台下笑到見牙唔見眼，同Yoyo個表情差好遠!
張晉同蔡少芬嘅戀情之前一直不被睇好，予人「女尊男卑」，張晉2014年憑電影《一代宗師》奪得第33屆香港電影金像獎最佳男配角就公開多謝太太蔡少芬：「對我的太太是蔡少芬，有人說我這輩子都要靠她，沒錯，我這輩子我幸福都要靠她，我謝謝她陪我一起走過所有的艱難，在我最低谷的時候我用很不好的態度跟她說：『只有你一個人欣賞我有甚麼用？』，謝謝大家讓我知道除了我太太還有人欣賞我。希望我們以後有更多的『風景』同路。」蔡少芬喺台下大笑大喊，睇得出佢真係好激動！