【聲明】港生活網站並無進行電話推廣活動

唔想周身痛最緊要保暖

發佈時間: 2021/01/14

2021年嘅1月5日,踏入小寒。今年嘅小寒真係唔算小。呢個幾禮拜加埋寒流襲港,真係寒。因天氣濕冷,引發我五十肩,膊頭扯住引致右手不能伸直。遇上天氣變冷,肩膀真係因而疼痛、無法抬高手,唔通真係凍而引發痛?唔怪之得五十肩亦被稱做冷凝肩或冰凍肩(frozen shoulder)?唔知係咪咁解呢?

唔理係乜原因,嗱嗱臨走咗去搵中醫師針灸,熱敷再食埋中藥止痛。Keep住做時,的確好似好少少,不過當天氣再凍啲,又嚟痛啲……

我好細個嘅時候,需要攬熱水袋取暖,長大後都無再攬過熱水袋了。估唔到喺我依家變老咗,又要攬番個熱水袋,身體邊個位置痛就將熱水袋敷喺邊度。

唔想筋骨卜卜脆,必須識保養,必須做保暖,頭頂最好戴帽或穿着連帽的外衣,並同時圍上頸巾或穿着有樽領嘅衣物。因為頭頂及頸椎最容易流失體溫,容易引發頸椎及肩膊痛症,所以真係要做好保暖。

除咗頭頸,雙手及手指嘅保暖亦十分重要。雷諾綜合症(Raynaud Phenomenon)嘅患者便會因雙手遇冷刺激血管急速收縮,造成手指皮膚蒼白及發紫、感覺麻木、刺痛及僵硬,所以如果呢排你對手唔係太靈活嘅話,應穿戴手套保溫。

雙腿則應着厚褲保暖,以防觸發膝關節炎等痛症。身體亦可以穿上透氣及抓毛絨fleece與外衣,一起營造多層(layering)保暖效果。

如果可以的話,用熱水浸埋腳,促進足部血液循環,通體舒暢,降低足部嘅肌張力,從而放鬆全身,緩解腰背疼痛。連外國都有研究證實,熱水浸腳仲有助睡眠。所以一邊追劇,一邊浸腳,浸完腳着番對襪去瞓覺,幾歎!果然真係由頭暖到尾!

下星期20號又要迎接大寒了,聽聞寒流又再嚟過,所以重要事要提醒3次!記得一定要keep住保暖!保暖!保暖呀!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭