回憶與李香琴拍《家好月圓》點滴 夏雨︰「嫲嫲喺大廳」已成絕唱

無綫由上周五起，於深宵時段重播《溏心風暴之家好月圓》，以悼念在劇中扮演嫲嫲、早前離世的李香琴（琴姐）。劇中琴姐兒子夏雨（Jo鮑）近日亦在FB發帖，透露特地深夜翻煲這齣經典，他又拍片大讚琴姐的工作態度︰「佢（琴姐）喺工作上乜嘢都唔會推搪都會接，係值得學習嘅前輩！」

《溏心風暴之家好月圓》於08年播出時熱爆全港，該劇集合不少好戲之人，不但在《萬千星輝頒獎典禮2008》橫掃最佳劇集等共八個獎項，男主角夏雨憑Jo鮑一角贏得視帝殊榮，創下其演藝生涯的高峰。可惜的是，踏入2021年，劇中的嫲嫲琴姐不幸因病離世，各界非常惋惜，無綫亦決定在深宵時段重播《家好月圓》，讓各界重溫琴姐的精湛演技。

讚黎耀祥閒角變視帝

前日，夏雨在FB以「懷念李香琴，琴姐」為題，上載約一分鐘的短片分享感受，他稱︰「最近一個令人好傷感嘅消息，就係琴姐離開咗我哋。佢係好值得人懷念嘅演員，佢喺呢個圈幾十年，我哋相識都幾十年，由《歡樂今宵》合作到依家，終於佢都離開咗（逝世）。」

夏雨又感觸指琴姐在劇中的金句「唔使驚，嫲嫲喺大廳」已成絕唱︰「佢（琴姐）係一個好好嘅前輩，佢對所有人都好和善，工作上乜嘢都唔會推搪，都會接，係一個好敬業樂業、好有演員道德、值得我哋學習嘅前輩，琴姐，一路走好。」早前，夏雨亦曾拍片自爆是《家好月圓》的粉絲，更問網友有沒有睇重播︰「近排無綫重播《溏心風暴之家好月圓》，我都有睇，睇番呢齣劇有好多回憶不自覺咁湧上嚟，從拍攝到播出，令好多人好鍾意，觀眾反應亦令我哋好興奮。」

他又指《家好月圓》不少場面、人事變動皆令人感慨︰「話晒都超過十年，好多演員亦慢慢淡出幕前，好似黎耀祥由當時仲係寂寂無聞，依家已經係三屆視帝，劇集引起好多回憶，有時間的話大家咪一齊睇下，我都會睇，懷念好多值得懷念嘅人。」不少網民感慨《家好月圓》一眾演員已各散東西；有視迷亦指這齣近13年前的舊作，是經典中的經典。

撰文︰Steven

編輯︰李潔盈

美術︰梁政敏