歌手‧門｜何超儀走音被唱片公司老闆炒魷 mean爆插多刀:你應該成世咪嘴

ViuTV全新節目《歌手‧門》邀請多組唔同背景嘅歌手單位，訴說佢哋音樂生涯背後嘅故事，帶領觀眾由全新角度出發再次認識歌手們，打破佢哋被大眾定型嘅形象！

最新一集就請嚟何超儀同佢嘅樂隊「何超與海膽仔」（Josie and the Uni Boys) 以及盧巧音。前者大方分享音樂路上遇到嘅挫折，自爆曾經畀唱片公司老闆狠炒，千金小姐都冇面畀！

{{hket:inline-image name="1.JPG"}}{{/hket:inline-image}}

節目開始時，問到何超儀會唔會同結婚16年嘅老公陳子聰生B，佢直言一開始係完全冇呢個打算，不過之後見到好多人「雪卵」又令到佢有啲動搖，但最後都係打消呢個念頭，因為家中已經有7隻狗狗，根本分身不暇，難以照顧小朋友。

{{hket:inline-image name="3a047c94d1505abc6ded8da507eefa2a.jpg"}}{{/hket:inline-image}}

而家係獨立樂隊一員嘅何超儀，當年曾加入主流唱片公司，佢指當時唱片公司交畀佢唱嘅歌「只有50%係我鍾意唱」，而其餘50%係唱片公司「想畀佢唱」，亦因為喺呢間唱片公司發生嘅事令到佢幾乎放棄音樂，「我有一次喺活動失準，我真係聽唔到（音樂），我哋以前冇ear mon (ear monitor) 戴，所以我聽錯chord唱錯key。」

何超儀續指，走音令到當時新老闆好不滿，「新老闆話『我哋唔容許走音artist喺華星，我哋全部歌手都係攞歌唱比賽冠、亞、季軍出嚟！佢哋冇走音呀！不如咁啦……不如咁……其實我哋都可以滿約喇』，我堅持叫佢畀多次機會我，然後佢話『其實你都冇唱歌天份，如果夾硬做歌星，應該呢世都咪嘴 (假唱) 』，合約完咗，我成個人冇晒希望！」

（↓點擊圖片放大↓）

何超儀之後遇上樂隊LMF（大懶堂），佢指當時經常去band房「hea」，機緣巧合下做咗樂隊和音，再喺隊員之一嘅KB (李健宏) 鼓勵下同佢另組「何超與海膽仔」(2010年成立)。她表示好感激爸爸同家姐喺音樂路上畀咗好多建議，又話音樂對佢嘅意義好重大，自己由細個已經好鍾意唱歌。樂隊其他成員指一開始見到「千金小姐」何超儀時都有所保留，冇諗過可以同佢夾到咁耐，又大讚佢嘅性格其實好隨和、平易近人。

她就表示如果唔係有「何超與海膽仔」，佢唔會再有機會做音樂，多謝隊友們一直支持，「手中有咪，心中有歌，背後有你哋！」