栗子：童年的幸福滋味

好多人細個鍾意食嘅嘢，大個咗就未必鍾意食。而我竟然由細個到而家都咁鍾意食栗子。

栗子所帶畀我嘅感受，真係非同凡「響」--食完栗子放嘅屁，真係好響㗎！點解嘅？因為栗子中含有豐富澱粉，當大量澱粉進入腸道，不能及時消化，便會出現消化不良嘅情況，繼而令產氣菌大量滋生，導致氣體堆積喺腸道中，氣體就會以放屁形式從腸道中「砵砵」聲排出，爽！

細個嘅時候，每當去戲院睇電影，門口必定有糖炒栗子賣。當揸住包熱辣辣的栗子入場，一邊睇戲，一邊用牙同手剝開啲殼嚟食栗子肉，隻手就黐𣲷𣲷到散場，你有無呢個體驗？呢啲真係快樂童年回憶之一。

所以當而家我聞到有糖炒栗子嗰陣煙味，加上見到啲叔叔用鐵鏟不斷將啲黑砂加糖連帶栗子係咁炒呀炒，童年味道即時湧出。我時時都走去幫襯亞皆老街天橋底下面伯伯賣嘅炒栗子；有時仲買埋煨番薯，或者鵪鶉蛋……嘩！食完真係感受到大腸入面，氣勢磅礡，一放不可收拾！

栗子唔單止炒嘅好食，栗子蛋糕又係我超級喜愛嘅蛋糕選擇。而我只愛「西餅皇后」李曾超羣首創、以前嗰隻有鮮忌廉嘅經典栗子蛋糕味道，而家好少西餅店食得番呢隻味。

帝苑酒店嘅西餅部，就最似兒時嗰款栗子蛋糕味道，因此遇上朋友生日，我一定爭住買生日蛋糕，因為我一定去帝苑酒店餅房買佢哋嘅栗子蛋糕嚟慶祝，其實就暗中滿足自己嘅慾望，係咪好聰明呢？

講到最幸福嘅栗子味道，必定係我媽咪喺我細個嗰陣，時時整畀我食嘅栗子炆雞。整嘅步驟並唔算複雜，但唔知點解，喺任何地方食呢味餸，都不及我媽咪嘅手藝，唔係因為佢廚藝了得，而係有我媽咪嘅愛喺餸入面……

而家佢已經老咗，不便下廚，但嗰份幸福味道卻會永遠刻喺我個記憶體同心窩之中。

（本欄逢周四刊登）