用老公錢投資 苑瓊丹要做上市公司老闆

苑瓊丹（苑仔）一向甚有生意頭腦，除早前進軍飲食業，近日更宣布投資超級市場。超市日前才正式開業，但苑仔已經雄心壯志，豪言以上市做目標。

日前苑仔與其他股東出席超市開幕儀式，心情大靚的她滿場飛招呼來賓，而本身瓣數多多的她，做每種生意都信心十足，她表示︰「我會以上市做目標，靠我自己就梗係做唔到啦，好在識到一班老實唔呃人的拍檔，佢哋做實事，我負責做宣傳，咁就一齊打天下。」苑仔又指藝人做生意容易被欺騙，自己也擔心會損手蝕入肉，所以選拍檔十分困難。苑仔又笑謂︰「如果有朝一日，可以過過上市公司老闆癮，咁就一生無憾。」

賺了見面時間

苑仔坦言將不斷擴充業務，目標每區都有新店開張︰「超市走貼地路綫，希望街坊慳到錢，我們又賺少少咁囉！加上我有做即食餸包品牌，依家一條龍咁做，愈搞愈大，多錢過我老公。（你有錢啲定老公身家豐厚啲？）傻啦！我啲錢係我嘅私己，佢啲錢係賺嚟養我，所以永遠都係我贏晒。」苑仔笑言老公不介意她忙碌而沒時間拍拖，就算多個月不見也沒所謂，她表示︰「唔係我哋感情有問題，而係我哋生活習慣係咁。之前無疫情，我去內地拍戲一走就幾個月，無信任維繫唔到，所以過去年有疫情無得離港開工，佢賺晒見我嘅時間，我當然要用佢啲錢去投資做下生意啦。」

撰文︰倪小珊

編輯︰黃卉彤

美術︰顏玉玲