【聲明】港生活網站並無進行電話推廣活動

邊位藝人花名最好笑? 洪永城:叫我「洪風」好尷尬

發佈時間: 2021/01/22

人生流流長,總會有幾個花名,無論是普通市民,抑或是曝光率高的藝人,被人改花名實屬等閒事。不少藝人對小時候的花名記憶猶新,向來風趣幽默的洪永城,原來袋住幾個搞笑花名;龔嘉欣的真名「嘉欣」雖然普通得總有一個喺左近,但因姓氏較特別,花名亦帶點男仔頭色彩。

洪永城自從與兼任健身教練的藝人梁諾妍拍拖後,身形愈來愈fit,不過洪永城小時候原來是肥仔一名,更被家中長輩改花名。他說:「我細個好肥嘟嘟,加上好鍾意玩具車,啲車仔成日發出『嘟嘟』聲,所以親友索性叫我『嘟嘟』。」除了「嘟嘟」,他小時候又名「洪七公」,他說:「因為當年金庸武俠劇《射鵰英雄傳》好hit,劉丹演嘅洪七公深入民心。」

洪永城笑言想不到「洪」這個姓氏,會成為出色的花名素材,至於自己由細到大被改過的花名中,他對以下這個最抗拒:「我最唔想被人叫『洪風』(雄風)囉,好鬼尷尬㗎嘛!其實入行之後,除咗有人叫我『洪爺』之外,亦有人叫我『洪一陣』(紅一陣),好似唔多老黎,不過啲花名幾得意,我都無所謂嘅。」

龔嘉欣︰「龔仔廚房」食咗先講

龔嘉欣笑言小時候沒有甚麼花名,只有乳名:「通常屋企人鍾意叫疊字,好順口咁就叫我『欣欣』。大個咗大家多數會叫我做嘉欣或者英文名Katy。不過,其實呢行好多人都叫嘉欣,所以啱啱加入TVB無耐,有工作人員叫我做『龔仔』,聽落又幾順耳,同埋比較特別。」

閒時熱愛下廚的嘉欣,因為十分喜歡「龔仔」這個得意的稱呼,所以每次在社交網分享自己炮製的美食時,索性用上「龔仔廚房」的hashtag。嘉欣說:「我覺得『龔仔廚房』幾得意,人哋又容易記得,依家一提『龔仔廚房』,就知我分享自己煮嘅嘢食喇!」

陳庭欣︰「雀后」唔識打牌

陳庭欣(Toby)向來是愛鳥之人,飼養多隻鸚鵡的她,笑言因此擁有一個霸氣花名:雀后。Toby說:「不過好多人唔知我有養鸚鵡,以為我叫得做『雀后』,打麻將一定好厲害。其實我打牌好水皮,最近先啱啱學識打台灣牌咋!」

樣靚身材正的Toby,自爆小時候身形圓碌碌:「我細個花名叫『大蕃薯』,因為我好肥好圓,加埋個冬菇頭髮型,行起嚟又論盡,屋企人同親友成日笑我行路一仆一碌!阿姨成日話我好彩細個咁圓碌碌,大個咗唔係咁,依家我覺得自己似長條形蕃薯多啲!」

何遠東:零食太多變「東記士多」

以往出名肥胖的何遠東,積極做運動減肥,成功由肥東變瘦東。不過他坦言從小跟「肥」結下不解緣,花名全都與自己的身形有關。阿東說:「讀小學六年班嗰陣,同學都叫我『東記』,因為當時我已經好肥,加上好多大牌檔都係乜記物記;我又好鍾意食嘢,同學仔覺得我個書包成日有零食,成間士多咁,所以大家好順口咁叫我。」

阿東表示他的另一花名叫「肥豬」,天性樂觀的他笑說:「可能細個有套動畫叫《飛天紅豬俠》,所以同學咁叫我,不過其實啲角色個樣好可愛,大家叫得多,自己聽慣咗覺得無乜嘢,都係一個稱呼啫。」

採訪︰Pauline

編輯:李潔盈

美術:梁政敏

邊位藝人花名最好笑? 洪永城:叫我「洪風」好尷尬

洪永城努力操練身形,舉啞鈴時夠晒「雄風」。(IG圖片)

邊位藝人花名最好笑? 洪永城:叫我「洪風」好尷尬

小時候的洪永城不但肥嘟嘟,更似足卡通公仔粉屁桃。(資料圖片)

邊位藝人花名最好笑? 洪永城:叫我「洪風」好尷尬

未知洪永城何時會加多一個「人夫」花名?(IG圖片)

邊位藝人花名最好笑? 洪永城:叫我「洪風」好尷尬

龔嘉欣早前在《今晚請客》中大顯廚藝,炮製一道乾燒大蝦。(IG圖片)

邊位藝人花名最好笑? 洪永城:叫我「洪風」好尷尬

龔嘉欣閒時在網上分享煲湯心得,相當有潛質做賢妻。(IG圖片)

邊位藝人花名最好笑? 洪永城:叫我「洪風」好尷尬

陳庭欣視愛鳥為心肝寶貝。(IG圖片)

邊位藝人花名最好笑? 洪永城:叫我「洪風」好尷尬

現在的陳庭欣身材fit爆,絕對不似「大蕃薯」。(IG圖片)

邊位藝人花名最好笑? 洪永城:叫我「洪風」好尷尬

何遠東靠做運動瘦足幾個碼,立即型仔晒。(IG圖片)

邊位藝人花名最好笑? 洪永城:叫我「洪風」好尷尬

何遠東過往身形「肉騰騰」,是無綫的御用肥仔。(IG圖片)