湯怡秘撻「舞男」麥秋成雙喜臨門 洪卓立留言「恭喜恭喜」粉絲喊喊

湯怡2018年突然公布同洪卓立分手震驚全城，二人拍拖11年人前非常恩愛，所以分手消息一出真係跌到一地都係眼鏡碎！大家除咗當八卦咁睇之外，更多嘅係替佢哋婉惜，當正佢哋係身邊嘅朋友咁非常代入。呢兩年嚟都曾經傳出二人復合嘅消息，不過都係子虛烏有，而今日，湯怡喺社交平台驚喜宣布自己雙喜臨門！

{{hket:inline-image name="141443447_695838977760534_2240501541974654680_n.jpg"}}{{/hket:inline-image}}

湯怡公布結婚懷孕，不過對象唔係洪卓立，而係「舞男」麥秋成。湯怡喺佢嘅社交平台Post咗幾張婚照以及生活照，寫下對未婚夫嘅「愛的宣言」：

「致 麥秋成
曾經擦身而過的我倆
能夠走在一起 是緣份
現在能守在一起 是福份
謝謝你的光臨
完整美滿了我的人生
亦充滿甜蜜 色彩與歡樂
餘生 請多多指教
#我們仨 #愛在蜜園」

湯怡回應《晴報》訪問，指原來佢同男方早已結緣，「同麥秋成認識咗一段日子，亦相處咗一段日子，因為大家都比較低調，所以除咗屋企人，我哋都冇特別同其他人分享呢件事。將喜訊同大家分享之後，今日就會入紙排期註冊。下個月會有個簡單嘅婚禮，因為限聚令，所以邀請唔到太多人出席。疫情過後會補辦婚宴。其他嘢都唔再特別回應，多謝各位傳媒朋友關心。」

麥秋成都同未婚妻同步出Post：

「致 袁家怡（湯怡本名）
愛真是奇妙
在生命的巨輪上我們曾經多次相遇
誰想到命運之神早已把我們緊緊扣著
你的愛 讓我感到無比幸福
亦願我的愛 能讓你心 平靜溫暖和快樂
日後的路上 願我們互相扶持
亦煩請在生活上多多指教
#我們仨 #愛在蜜園」

麥秋成回應指佢同湯怡為咗保護愛苗一直都低調處理，「首先感謝各位的祝福，這些日子我與家怡也如一般情侶一樣，逛街、吃飯，與朋友聚會，有時候我們一起走到街市買餸，戲院仍有營業時也一起看戲，我們並沒有刻意去避，低調處理感情是因為保護心中所愛。當然公司和經理人知道我在蜜運中，也不需我刻意提及另一半的事情。在此感激公司給予的空間及支持。二人相悦是奇妙，能找到終生的伴侶是恩典，孕育下一代亦是恩賜。現在我們如常工作之同時，也努力籌辦我們的小型婚禮，婚禮將會簡單而隆重，由於限聚令關係婚宴將會設於疫情之後，以招待各方好友及夥伴。到時候敬請狂歡暢飲，為美好而起舞。」

相關新聞：蔣家旻傳暗撻蔡思貝舊愛麥秋成  三個月戀情浮面 IG互動透玄機？【下一頁】

（↓點擊圖片放大↓）

英皇高層湯怡經理人Ｍani收到消息都好開心，「英皇真係喜事浪接浪，好興奮，公司衷心恭喜湯怡和麥秋成雙喜臨門，我們大家都很開心，為他們高興！湯怡16歲加入英皇這個大家庭，看著她逐步成長，現在她將成為幸福的新娘子及美麗的媽媽，我們好安慰，祝佢哋白頭到老，永遠幸福。」

而大家都非常關注女方前男友洪卓立嘅感受，佢喺湯怡出Post冇耐之後留言：「恭喜恭喜！身體健康！幸福快樂！」洪卓立亦大方回應《晴報》，「作為好朋友，當然恭喜同戥佢開心。祝福兩位幸福快樂！身體健康！」反而最放不下嘅係一眾粉絲，唔少人都留言畀「喊喊」洪卓立，「點解我見到你留言之後，反而個心碎左。」、「心在淌血……」等等。