【聲明】港生活網站並無進行電話推廣活動

《地母經》測中瘟疫難退

發佈時間: 2021/01/28

本來以為小寒(節氣)凍,大寒會更凍,我仲提醒大家要注意保暖。結果大寒嗰日,不寒。喺正常情況下大寒應該係天氣最冷嘅時候,但如果嗰日天氣不冷,呈現反暖情況,對古人嚟講,並不認為呢件係好事,因為氣候反常,會影響以後天氣會變得更惡劣,於是人、牲畜、莊稼都唔會安寧。

2021年《通勝》內,《地母經》預測︰「人民漸蘇息,六畜瘴逡巡」,當2021年嘅疫情緩和後,動物又進入一次次嘅瘟疫之中,「六畜瘴逡巡」所指嘅「六畜」就係牛、馬、豬、羊等家禽,依家中國又開始有新一波非洲豬瘟了。唉!豬嘅價格已經好貴,有豬瘟嘅話,豬價又再升了。

你可能話我好迷信,但我只係以古人嘅智慧,去探索年景而已。

以前喺農耕社會,人人都係睇天氣食飯,因此古人對天氣變化同埋年景嘅預測頗有心得,雖然呢啲預測並不一定百分百準確,但亦有一定嘅概率。《地母經》同春牛圖相輔相成,《地母經》係以六十甲子嘅循環排列,每一年都有一首詩同一篇卦文,嚟預測農作物同年景的。所以《地母經》一般都是附載於春牛圖一頁內。

古人認為自然災害有一定嘅規律性,而《地母經》亦係根據呢種規律嚟預測。而我fact check咗2019年同2020年嘅《地母經》預測,都認可佢嘅準確性。

我啲朋友喺2020年5、6月見疫症數字平復,於是佢哋就好樂觀對待,認為COVID-19會好快過;但當時我已經好肯定同佢哋講,到2021年呢個病仲會不斷變種,所以我哋絕不能鬆懈應對。

佢哋見我咁肯定,問我係咪有教授話我聽,我話係《地母經》時,佢哋全部喺度笑我。你睇?至少今次又真係再畀《地母經》講中咗,所以古人嘅智慧,真係厲害㗎。

咁你會問︰知道咗,咁又點?至少我會繼續自覺自律,用樂觀嘅心態嚟面對嚟緊嘅唔樂觀生態!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭