【聲明】港生活網站並無進行電話推廣活動

維繫甜蜜家庭環境 陳展鵬:屋企2個女人好重要

發佈時間: 2021/01/28

陳展鵬與陳煒(煒哥)昨日在電視城出席新劇《黯夜守護者》(暫名)拜神儀式,二人各自擁有美滿的感情生活,展鵬與妻女享受甜蜜家庭樂,煒哥則與醫生男友感情穩定,更被拍得拍拖睇樓盤。

陳展鵬與陳煒同屬亞視出身,今次終於在無綫合作非常開心。煒哥表示開工第一日已經要拍跳樓戲,又要拍攝她駕駛的戲份,她說:「我拍過好多揸車戲,大家都以為我識揸車,但其實我無車牌。不過我都唔諗住考牌,都一把年紀喇!」展鵬聞言講笑說:「咁你有司機㗎嘛。」

展鵬表示在新劇的動作戲不多:「開工我都唔捨得出門口,不過今次拍得舒服,時間又OK,可以見多啲老婆同個女。」早前展鵬趁不用開工時,與妻女一齊出外野餐,順便讓女兒「小豬比」放電,提到女兒餵他食柑,太太單文柔可有呷醋?他笑說:「屋企兩個女人(妻女)好重要,要好好維繫甜甜蜜蜜嘅家庭環境。最緊要媽咪(單文柔)開心,我就開心;媽咪唔開心,爸爸(我)就好煩!」展鵬表示女兒懂得聽他們的指令,相當有趣:「有時我哋叫佢拎襪,又叫佢拎紙巾,走幾轉佢會好開心。」

陳煒同男友結婚有共識

至於煒哥近日被拍得與醫生男友陳國強在跑馬地睇樓,不過煒哥再三否認好事近:「我哋有共識,就係『未』(結婚),而且我都仲要開工。」她解釋因見到樓價下調,加上跑馬地又難得有新樓盤:「咁咪去睇下樓,因為我啲積蓄放喺度都係貶值,所以要諗下其他投資方法。」

採訪︰Pauline

攝影︰林良明

編輯:李潔盈

美術:梁政敏

維繫甜蜜家庭環境 陳展鵬:屋企2個女人好重要

陳展鵬早前獲妻女慶祝44歲生日,令他心滿意足。(資料圖片)