草莓當造麥當勞推3款「福岡の莓」雪糕

不時不食，嚟到草莓當造季節，黛安收到風，一股「草莓旋風」即日起登陸麥當勞，3款期間限定嘅「福岡の莓」系列雪糕等住大家品嘗。身為草莓控嘅黛安，淨係睇相已畀3款雪糕嘅造型俘虜咗，因為每款都載滿甜蜜嘅深淺粉紅色。

麥當勞仲有好心思咁為每款雪糕添上特色，例如草莓新地筒個筒換上可愛粉紅色造型；脆皮草莓新地就以草莓醬托底配搭草莓新地，可享二重草莓風味；仲有新推出草莓麥旋風，有粉紅脆片、朱古力曲奇碎同酸甜草莓醬，多重口感，超豐富呀。呢3款特色雪糕數量有限，售完即止，黛安都要去麥當勞做「追風族」喇。