身為加拿大移民顧問的我成日比人問, 點解多倫多咁多年來都係香港人的移民聖地? 原因好簡單, 就係多倫多絕對比到你一個家的感覺, 即使你移民到多倫多, 都同向香港生活無太大的分別, 無論你係一個幾咁「港燦」的人, 都絕對可以適應到多倫多「小香港」的生活。 自80年代尾90年代初香港移民潮之後，來自香港的新移民開始聚居向多倫多市以北的萬錦市和列治文山一帶，慢慢形成一個加拿大獨有的「小香港」 。
多倫多獨有的「小香港」
萬錦市這個「小香港」同時亦吸引很多香港人向當地創業, 令萬錦市成為加拿大最多香港人商店和食肆的城市, 無論向萬錦市邊條街頭巷尾都絕對搵到香港人商店的蹤跡, 就連全北美最大的購物商場「太古廣場」、「時代廣場」、「朗豪坊」都是位處於萬錦市,大家聽到個名都已經感受到萬錦市嗰陣香港味。其實就咁講真係好難形容到萬錦市有幾香港, 不如等我帶大家黎個「小香港」一日遊, 同大家分享下我呢位萬錦港佬地膽如何向多倫多過香港一樣的生活 。
身處萬錦市亦能享受香港一樣的生活
同好多香港人一樣, 每朝起身一定要去屋企附近間荼餐廳食番個早餐先有精神去開始一日的工作, 今日就揀左屋企附近間「新城市茶餐廳」食番個沙嗲牛公仔麵加杯熱咖啡醒一醒神。最諷刺的是呢邊茶餐廳的樓面阿姐的廣東話仲純正過香港的茶餐廳或者譚仔, 絕對唔會一入門口就聽到阿姐問你「令仔，幾多鬼呀?」或者「令仔，忍咩嘢？」咁爆笑的廣東話, 有時令我懷疑萬錦比香港更香港。
午餐就簡簡單單咁去公司附近間「沾仔記」嗌番個雲吞麵加樽裝熱維他奶去解我思鄉之苦, 不過其實住得向萬錦, 又有乜幾可思鄉呢? 食完個午餐見仲有少少時間, 記得太太今朝吩咐我幫佢買枝化妝水, 唯有順路去隔離「時代廣場」間「莎莎」幫太太補貨,呢啲香港人投資私商店的店大多聘請番香港人做店員, 就連買每間車行或地產鋪, 都一定會有識廣東話的人做經紀, 所以真係買野都唔洗擔心溝通唔到。
下午茶又點少得去「龍島」買番個酥皮蛋撻同絲襪奶茶慰勞自己, 講到呢度, 好感恩自己當初移民黎多倫多呢個「小香港」, 因為向香港享受到的美食, 呢邊一樣可以享受到, 甚至比香港更出色。放工番屋企之前,我同太太兵分兩路, 太太就去大統華超市買買餸, 而我就去萬錦廣場斬番舊靚叉燒加料,每次萬錦廣場左右並排的兩間燒臘舖都有人排隊, 但我始終鍾情於右手邊嗰間味香園。所以生活向萬錦市, 無論大至買車買樓, 小到衣食住行, 都與香港的生活無異, ,真係撞口撞面都係香港人, 萬錦市真係名副其實的小香港。
加拿大政策支持及尊重多元文化
萬錦市獨有的「小香港」是絕對唔會向其他國家見到的, 因為其他國家的移民政策都是主張新移民去融入當地的文化, 相反加拿大的多元文化政策一向都支持和尊重新移民去保留自己的傳統文化特色, 令到香港的本土文化得以向萬錦市百花齊放。亦因為加拿大的多元文化政策, 令大家向加拿大除左能享受到同香港無異的生活之外, 同時亦可以感受到其他不同國家的文化特色, 例如向多倫多Yonge街的韓國街(Koreatown North) 、Danforth Street的希臘街(Greektown) 、College Street的 小意大利 (Little Italy) 等等。 雖然大家向其他國家可以搵到小小的唐人街,但絕對唔會搵到一個好似萬錦市的「小香港」。所以移民多倫多, 除左比移民其他國家更易適應, 更唔洗擔心點樣先可以融入當地的文化。
移加有得揀
其實大家點解會想移民, 無非都係想比自己和家人多個選擇,而我相信多倫多絕對比其他國家比到你更多的選擇 , 最起碼我想食個叉燒飯, 向萬錦市已經有幾十間燒臘舖比你揀, 就連食個菠蘿包, 向萬錦市求其一條街都會搵到間港式麵包鋪買到一流水準的菠蘿包。我敢保證你一定唔會向其他移民國家可以享受到咁貼近香港的生活, 就以我一個朋友為例, 她一家近年移民左去英國北部, 她居住的地區只有唯一 一間唔太正宗的茶餐廳, 而且距離屋企最少40分鐘車程, 真係食個沙嗲牛麵都唔係咁易, 就算味道麻麻亦無另一選擇, 搞到佢日日都掛住咁香港。由此可見, 多倫多的確比其他國家更容易令香港人適應, 所以多年以來多倫多都係香港人移民目的首選, 亦只有多倫多更能帶比香港人一個家的感覺。
facebook專頁:@mapletree.hk
撰文：駐加拿大專業移民顧問 Andrew Tang