陳瀅加國完成隔離後滑雪打卡 被質疑疫下通處走問非所答

藝人陳瀅（Jeannie）早前飛返加拿大探望婆婆，喺上個月5號仲完成埋家居隔離，終於可以「出關」！Jeannie早前同朋友去到溫哥華史提夫斯頓漁村（Steveston Village）及Cypress Mountain滑雪場喪玩兼打卡，仲將度假相上載到社交平台。相中見到Jeannie仲有去浸溫泉，大曬佢白滑玉腿，相當識歎。此外，Jeannie仲放肆狂食好嘢，佢自己都擔心遲啲會肥好多返香港呀！

{{hket:inline-image name="138542658_1135163340282320_2028250922037157974_n.jpg"}}{{/hket:inline-image}}

不過有網友呼籲Jeannie喺當地要遵守「禁聚令」，亦建議她影靚相都要記得戴上口罩。陳瀅同網民玩你問我答時，有人更質疑Jeannie點解疫情期間仲可以四處去，Jeannie亦親自回應，不過就有啲問非所答。

Jeannie表示：「首先要擁有當地護照，然後要隔離14日，返香港時再要隔離21日。其實一啲都唔容易，同埋一啲都唔平，不過無辦法，始終屋企人最重要。」舟車勞頓都係為陪93歲嘅婆婆，有網友讚佢好孝順，Jeannie就話：「我希望係，會一直想做更多更好。」

（↓點擊圖片放大↓）

Jeannie入行以來一直都隱瞞自己身世，細個生父病逝，媽媽改嫁喺內地經營大型商場嘅商人，陳瀅同後父關係唔錯，不過由於父母忙於工作，經常留守廣州，所以將佢送到加拿大，交由婆婆照顧。多年來兩婆孫「相依為命」，幾年前婆婆患上腎病，老人家不肯乖乖就醫，拍緊《跳躍生命線》嘅Jeannie更加心急，研究劇本時知道戲內「嫲嫲」羅蘭患上肺癌，頓時感同身受，眼淚放題！Jeannie亦好珍惜同婆婆嘅相處時光，所以咁辛苦都要「捱」隔離監陪婆婆。

圖片來源：Instagram