叉錯腳受傷骨裂 胡鴻鈞扮初哥哥無影響：少用下半身

胡鴻鈞在新版《十月初五的月光》扮演「初哥哥」，他日前拍外景時不慎叉錯腳，導致右腳骨裂，認真黑仔。他昨日孖新版「祝君好」何依婷出席劇集拜神儀式，笑言幸好傷勢不影響拍劇，劇組也遷就他先拍文戲。

胡鴻鈞、何依婷、郭子豪及羅天宇等，昨日在電視城出席新劇《十月初五的月光》記招，右腳受傷的胡鴻鈞要撑住拐杖慢慢行上台。他笑言日前在流浮山拍外景時出事：「其實我好低B，當時環境好黑，我踩咗落水氹，聽到『啪』一聲都心知不妙，好彩有工作人員幫我敷冰，之後再去醫院照X光，醫生話我骨裂，叫我要少啲郁動，多啲休息。」他表示現在劇組決定先趕拍文戲：「我剩係上半身做戲，下半身好少用，不過自己係好腰好腎好男人。」

何依婷聞言，表示自己主動慰問胡鴻鈞：「佢受傷後我無窒佢，我仲好錫佢，全程不停send message問咗幾個鐘，問到佢覺得我煩，仲話我『你問夠未？』我唔怕有咩誤會，我只係關心對方。」胡鴻鈞即說：「其實何依婷驚我影響拍攝進度啫！」

何依婷演祝君好有壓力

二人初次合作拍劇，自認新人的何依婷賣口乖說︰「胡鴻鈞前輩轉數好快，我唔夠佢鬥嘴。」張智霖與佘詩曼的《十月初五》是觀眾心中經典，他們坦言珠玉在前有壓力，胡鴻鈞說︰「壓力一定會有，盡量做出自己嘅新版本。」何依婷則說︰「我有睇番套劇，但唔係參考，希望搵到對比，加入自己嘅新元素。」

採訪︰Pauline

攝影︰林良明

編輯：李潔盈

美術：梁政敏