消委會10大消費新聞 口罩搶購潮高票奪冠

黛安一向有留意唔同嘅消費新聞，消委會噚日公布咗「鼠年十大消費新聞」選舉結果，結果口罩荒、搶購潮等與疫情相關嘅新聞全部上榜。等黛安同大家重溫，送鼠迎牛，避免再墮入消費陷阱！

公關姊妹話，呢個活動係由《香港經濟日報》、《晴報》、《TOPick》及《U周刊》等新聞機構同消委會合辦，今次仲破紀錄有6,038人投票。投票結果顯示，「疫情爆發各區現搶購潮超市推限買令」憑5,531高票奪冠，同時獲選為年度最矚目消費新聞、年度最離譜消費新聞㖭。

另外，「農曆新年口罩供應短缺消委會促商戶勿『趁火打劫』抬價」則以百幾票之差獲亞軍。獲得第3同第4名消費新聞，分別係「國泰重組旗下港龍航空停運」及「疫情重創旅遊業2020年頭9個月73間旅行社結業」，各得5,157及4,522票。疫情下外遊遙遙無期，若想趁低價買機票，小心得不償失。