重提已故初戀情人 梅小惠︰感激曾偉權對我嘅保護

梅小惠日前接受《1圈圈星光背後》訪問，談到去年11月因癌病去世的初戀情人曾偉權，小惠透露在胞姐梅小青口中才得知舊愛死訊。對於曾偉權承認蹉跎了小惠的歲月，小惠沒有怨恨，反而由衷感激對方的愛。

梅小惠跟曾偉權於86年在亞視邂逅相戀，直到99年因第三者介入而分手，他亦是小惠唯一承認過的男友。談到曾偉權生前因浪費小惠的青春而感到歉意，小惠說︰「權權太客氣喇，我放低咗好耐，佢都應該放低。人生有唔同過客，應該記得同珍惜佢嘅好，唔好嘅就要忘記，否則只會折磨自己。我好感激權權由我21歲開始對我嘅保護，令我無被人呃，亦令我有家庭嘅感覺，等我可以專心工作。最後分開亦唔係單方面嘅責任，或者我都做得唔夠好。」

跟周星馳合作訓練急才

曾偉權曾提到因小惠想結婚，但他想先打好事業基礎，令二人有分歧，小惠坦言︰「我相信大部分女仔拍拖十幾年，無邊個唔想結婚，我哋有憧憬過，但最後點解去唔到另一階段，我真係唔記得，總之有問題啦！」去年曾偉權離世，小惠說：「事前我唔知權權患癌，只知佢唔舒服。佢走嗰日，家姐（梅小青）打電話問我有無收到消息，到第二天記者先證實咗。我好感激權權畀我一晚時間，去回憶佢對我嘅好，等我能夠真心自然咁回答大家。」

另外，小惠亦在訪問中提到當年與周星馳合作的趣事，她回憶當年拍《他來自江湖》說：「星仔當時唔cool，其實係佢訓練我嘅急才。同星仔拍戲，讀熟晒劇本都無用，因為次次喺現場，都聽到佢同導演李力持改劇本笑到咔咔聲！」

撰文︰倪小珊

編輯︰李潔盈

美術︰梁政敏