疫下生活︳父母不信「在家工作」質疑失業 港男無奈租80呎「密室」開工避家人

本港爆發新冠肺炎疫情後，市民留家時間多，與家人相處機會增加，卻同時衍生更多家庭問題。一名港男在公司安排下留家工作，未料遭家中兩老質疑「被炒」失業，不但每日「轟炸」怒罵他不努力，加上家中環境太嘈吵，他無奈下花7,500元租80呎工廈「密室」工作3個月，感慨謂：「希望其他人唔好有我呢啲遭遇......」

一名網民「培」向Facebook專頁「辦公室日報」投稿，稱公司於疫情期間已多次安排同事在家工作，然而其父母一直不相信，經常追問他「係咪俾老細炒咗？係咪失業唔敢講？」即使他多次否認，並向父親展示公司電郵作證明，對方卻不願了解，繼續責罵：

「唔識睇啲雞腸（英文）！叫你畀心機又唔聽，以前成日請假去旅行，而家好啦！市道唔好一定炒你呢啲懶人先！」

在家工作被父母質疑失業

事主心裡駁斥，以往請假去旅行都是申請放大假，若未能清掉假期更會被公司迫放假，強調自己絕非懶惰員工。直至近日，由於同事居住的大廈有人確診，老闆為了員工安全，再次安排所有人在家工作直至3月，未料此措施反令他深感苦惱，

「本身都打算年廿八收爐，但我一啲喜悅都冇，因為我知留家工作係一個大難題，如果唔係老細落聖旨，我真係唔介意自己一個返office做嘢。」

家庭環境嘈吵「日鬧夜鬧」

事主表示，父母今次一如以往拒絕相信，「日鬧夜鬧，日哦夜哦」；即使他關上房門致電客人談公事，父母仍會叩門和大叫，還把電視聲量調高，他直言完全無辦法專心工作。每當走出房門與父母反映問題，他們卻認為「冇可能有老細會畀員工咁樣做嘢」，他難忍怒氣駁斥：「你哋冇做過呢啲公司，冇遇過呢啲老細，唔代表呢個世界冇，唔係乜嘢都以你哋見過嘅嘢為標準！」

然而，其父母仍堅持他只是在掩飾被人辭退的「事實」，並大聲表示「鬧你只係為你好」，又覺得現時的年青人「唔捱得」、「唔識得珍惜份工」，認為「放假即係對公司唔忠誠，冇儘力」，事主對此深感無奈：

「因為佢哋以前嗰套就係咁，所以認為我哋呢代都要係咁，一份工就係要做一世，轉工就等於唔識得飲水思源，係反骨嘅行為。」

被迫租3個月80呎「密室」工作

由於每日被父母質疑失業，加上家中環境太嘈吵，事主只好另覓分租辦公室，在舊式工廈以$2,500月租一個80呎的無窗辦公室，作為短期工作地點。他透露，由於有窗和套廁的辦公室都較貴，只好選擇最便宜的「無窗無套廁」單位。然而，租約至少3個月，換言之事主至少要付$7,500租金，加上辦公室沒有提供傢俬，事主只好再買一張摺枱同和凳仔回去，感慨表示：

「始終呢段時間都要喺度打躉，唔止每朝一早『返工』出門口，放工都要較埋時間夠鐘先走，我真係覺得自己好折墮。」

事主最後表示，希望其他人不會有與他一樣的遭遇，又怒斥：「希望啲父母唔好再逼死仔女啦！未經歷過嘅嘢唔代表冇，時代唔同喇，唔好再成日講以前啦！」

網民批部分年老父母不懂世情

帖文引起大批網民留言回應，紛紛同情事主的遭遇，亦認同有部分年老父母不願了解現代社會發展，難以溝通：

 （↓點擊圖片放大↓）

文章內容獲「辦公室日報」授權轉載。

打工仔住佐敦「受限區域」老闆禁返工 遭冷嘲熱諷嘆被歧視：當我哋怪物，詳情即睇：【下一頁】

每朝索取《晴報》：精明生活．健康家庭．開心娛樂

撰文：賴天兒