產後復出 譚凱琪驚開工揼奶唔方便

郭晉安、譚俊彥、譚凱琪（Zoie）及王君馨等，昨日宣傳下周一播放的新劇《失憶24小時》。去年10月誕下女兒的Zoie，昨日正式復出，餵母乳的她稍後開工拍新劇，擔心拍外景時要揼奶相當不便。

昨日眾人以劇中造型現身，當中江欣燕穿上低胸睡衣，力谷事業綫的她更彎腰拍照。王君馨即問她︰「點解我咁樣着就無呢個效果？」江欣燕搞笑回答︰「因為我食得多砵仔糕！」至於產後復出的譚凱琪狀態回勇，身材纖瘦的她透露稍後將拍新劇《十八年後的終極告白2.0》，她希望工作和家庭兩邊兼顧。

提到在疫情下復工，Zoie笑言老公絕對無投訴，反而支持她的決定：「老公只叫我要小心防疫，其實新劇對手譚俊彥同陳山聰屋企都有BB，相信大家都好注重防疫。」她又指現時快四個月大的囡囡開始懂得認人：「我擔心（開工後）佢唔認得我，但佢飲我嘅奶水，好需要我！其實我最擔心出外景時揼奶唔方便，但盡做啦，我見有啲雪奶袋，或者揼完奶叫老公幫手運返屋企，自己都隨身帶消毒用品。」

譚俊彥學郭晉安做好男人

同場的郭晉安與譚俊彥在新劇鬥智鬥力，二人笑言入廠前做足功課背熟劇本。安仔說：「我哋基本上唔會帶劇本入廠，一見面都唔打招呼，係直接講對白！同埋唔使傾劇本，我哋埋位前開始講家事。」譚俊彥則大爆安仔是絕世好老公：「有次凌晨聽到安仔講電話，話一定要買到某隻藥，因為佢老婆唔舒服一定要食嗰款。我覺得自己原來係咁差嘅老公，要學安仔咁做個好男人。」

採訪︰Pauline

攝影︰林良明

編輯：李潔盈

美術：梁政敏