陳淑蘭
陳淑蘭

章子怡第一部電視劇

發佈時間: 2021/02/11

章子怡第一部電視劇

呢排我追緊一套內地古裝劇《上陽賦》,好睇!今年農曆新年假期,無得好似往時咁周圍拜年同吃喝玩樂,居家最好做嘅事就係搵劇煲。

章子怡一向拍開電影,呢套係佢嘅第一套電視劇,所以都係賣點。仲有趙雅芝同惠英紅,呢個卡士對我嚟講已經好有吸引力,之後我仲發覺男主角之一的周一圍,演出魅力超班!佢長相唔係時下流行嘅小鮮肉類型,但成熟嘅男性魅力同精湛演技,令人愈睇愈覺得佢帥氣,絕對係實力派演員嘅風采!我一見到有佢嘅出現,對老花眼就變成心心眼;佢同章子怡嘅感情戲睇到我心跳加速,好有感染力,好好睇!

不過,頭一兩集因章子怡要做一個活潑少女,嗰度真係睇到佢做得有啲吃力,不太討好。通常中年女星要做番少女真係好難,至今我最佩服嘅就係馮寶寶,佢80年代拍嘅《武則天》,演繹少女時代嘅武媚娘真係毫不造作,自然流露出少女味;到遲暮之年,又能演繹出武則天嗰份老態,寶寶姐真係勁!如果有機會,我覺得大家可以睇番呢套《武則天》,淨係睇馮寶寶嘅演技都超值啦!

再講番《上陽賦》,趙雅芝真係好靚好有氣質,喺劇集入邊佢係章子怡嘅母親兼公主,佢嗰份高貴令我眼前一亮,兼且已經好耐無睇到趙雅芝嘅演出,所以我覺得特別好睇。

其實呢套係大女主劇集,改編自寐語者小說《帝王業》。電視劇以原著女主角王儇的第一人稱敘述,所有事件、情節都企喺女主人公嘅角度,以女性視覺同觀點睇人情世故,因此導演侯詠透露,喺劇集嘅創作過程中,最大程度保留原著女性視角同態度,改編劇本嘅團隊亦係以女性為主,所以呢套劇特別啱女性朋友追捧,兼且有成68集,呢個農曆新年假期唔驚無世藝啦!(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭