謝天華扮聶風變「東方不敗」 網民點評藝人最爆笑古裝造型

「可塑性」對演員嚟講係非常重要嘅一環，唔少成功嘅藝人都扮咩似咩，一啲違和感都冇。然而時裝打扮好多時都冇乜大轉變，反而古裝造型就可以玩到好多「花臣」，有時仲可以為演員嘅氣質加分。日前有一位網民就喺網民開post邀請大家貼出自己覺得藝人最「出事」嘅古裝look，此帖引起好大迴響，大家都覺得用嚟解悶真係令精神為之一振！

{{hket:inline-image name="uGy9fXM.jpg"}}{{/hket:inline-image}}

Post主自己先「拋磚引玉」，貼出方力申2011年拍攝內地劇集《大唐雙龍傳之長生訣》時嘅古裝造型，大家都話一見到就笑到收唔到聲，仲問其實伙咪改圖，不過Post主就話佢係原圖直出，睇片仲更加出事添。其實方力申除咗《大唐雙龍傳之長生訣》外，仲拍過《唐朝浪漫英雄》，造型同樣係相當令人忍俊不禁。

（↓點擊圖片放大↓）

其他網民都即刻好踴躍討論，其中以謝天華喺《風雲5D》音樂劇入面扮聶風嘅造型最爆笑，有人話佢似東方不敗練葵花寶典多過似聶風。另外，亦有人post出黎明喺《十月圍城》中嘅長髮造型同樣都係好驚人，就連黎明都carry唔到，到底仲有邊個可以？除此之外，當然唔少得當年拍《神鵰俠侶》受盡負評嘅陳妍希，陳妍希當年被指欠缺「仙氣」，由小龍女變「小籠包」。而成龍當年拍古龍先生嘅兩套大作《劍·花·煙雨江南》同《飛渡捲雲山》嘅造型相信都係佢嘅黑歷史，同當年經常演大俠嘅狄龍同姜大衞等形成強烈對比呀！