【聲明】港生活網站並無進行電話推廣活動

疫情下Keep住有工開 張秀文多謝阿Bob帶挈添旺氣

發佈時間: 2021/02/17

張秀文過去一年在疫情下,工作量依然不斷,除了演出劇集,亦參與多個綜藝節目。自言「揼石仔」的她雖然實際收入減少,不過保持曝光率尤其重要,又特別感謝好拍檔林盛斌(Bob)帶旺她,令她有不少工作機會。

新春節目《天天開運王》正熱播,由薛家燕、林盛斌、張秀文、馮盈盈及區永權齊齊主持。張秀文由鼠年旺到牛年,經常在綜藝節目中亮相,賺到盤滿缽滿。不過她笑說:「其實只係『揼石仔』,真係無搵到真銀,不過一直keep住有得出鏡,都係一件開心事!」

張秀文特別多謝Bob帶挈,令她在疫情下仍然不停有工開。她笑說:「其實阿Bob真係好旺我,我有七、八成嘅節目都係黐住佢一齊做!我哋嘅緣份係上年做新年節目開始,同佢拍檔做主持好好玩。」二人合作多多,經常見面,有網民取笑靚女張秀文樣子竟變得愈來愈似Bob,她聞言笑說:「哈哈,會唔會係話我似Pearl(Bob太太)?」提到Bob似乎發福不少,張秀文即為拍檔說好話,指Bob可能因宣傳車仔麵生意,日食夜食,加上少運動才發福:「但我自己就好有自制能力,所以身材keep得到!」

最想訪問Do姐

另外,張秀文早前與崔建邦主持清談節目《諸朋好友》,播出以來口碑不俗。首次主持清談節目的她說:「最初知道主持呢個節目,壓力都幾大,始終喺邀請嘉賓方面我貢獻唔多,由阿邦負責主力約嘉賓,好彩個個嘉賓都好nice。」她笑言最希望能夠訪問鄭裕玲(Do姐):「平時Do姐訪問人就多,但佢受訪就好少,希望將來有機會同佢喺節目上對談,喺佢身上學習更多嘢。」雖然張秀文因工作撞期,未能繼續主持第二輯《諸朋好友》,不過她希望將來參與更多清談節目。

採訪︰Pauline

攝影︰林良明

美術:梁政敏

疫情下Keep住有工開 張秀文多謝阿Bob帶挈添旺氣

張秀文與林盛斌(右二)等合作主持新春節目。(IG圖片)

疫情下Keep住有工開 張秀文多謝阿Bob帶挈添旺氣

張秀文感激崔建邦教她做主持的技巧。(IG圖片)