《愛回家》佳叔│ 鍾志光悟出「不強求」豁達人生 「賺錢炫耀成就先叫做成功？」

鍾志光在《愛回家之開心速遞》飾演「佳叔」一角，表面上是貪小便宜的Cafe老闆，但背後卻是大龍生（羅樂林飾)的弟弟，亦是「威龍秘密網」的金主。現實生活中，演員兼評述員以外，他熱愛文學作品，以朗誦詩詞作為興趣，從中悟出人生道理，不強求、舒坦開心就是他最大的福樂。

無綫長期服務金牌│韓馬利入行40年因病改變人生觀 鍾志光蘇恩磁30年來火花十足【下一頁】

{{hket:inline-image name="DSC05350.jpg"}}{{/hket:inline-image}}

鍾志光被形容為「萬能鍾」，因他涉獵不同的範疇都魚魚得水，由起初的足球評述員，到後來當上演員、電台主持、教書等等，跟他在劇集中的小人物有著很大的區別。他說：「我生活分得好清楚，工作搵食當然排第一，但只係佔一部分時間，離開工作崗位之後，我喜歡朗誦和打麻雀。每人每日都有24小時，睇你點運用，我同人講我鍾意讀書，啲人覺得好好，但我同人講我鍾意打麻雀，大家又唔會有一樣反應。」他以去年疫情為例子，相信誰會想到全世界會停擺，誰會想到身邊的人會突然失去，所以人生難測，喜歡的就去做吧，「打麻雀之餘，我很喜歡朗誦，近年已經越來越少人參與，以為學生先會做，其實朗誦係將平面文字立體化，就好似貝多芬樂譜，要用鋼琴彈出嚟一樣。中國詩詞入面有好多傷春悲秋，悟到好多人生道理，人都會睇得化啲。」

{{hket:inline-image name="DSC05503.jpg"}}{{/hket:inline-image}}

熱愛中國文學的鍾志光認為朗誦能將情緒發洩出來，沒有追求好與壞，有時候在家裡洗手間朗誦完，就有種豁然開朗的輕鬆感覺，「唔好介意玩得叻唔叻，過癮之嘛，玩模型飛機可能成日都跌落嚟。做人最重要識得享受過程，如果只追求終極目標，要得獎、賺錢、或者值得喺人面前炫耀嘅成就，我覺得咁樣先係失敗。人生短短幾十年啫，求之有道，得之有命。我讀教育，好多人認為教育最高位置係做校長，我知道做校長條件要點樣做，但係咪一定要做到呢？我比較阿Q精神，得咪照做，唔得我又冇蝕底，過程中享受到嘅可能仲比賺錢緊要。」朗誦的先決條件是咬字正音，鍾志光認為新一代的懶音很難改變，因為沒有人用心去糾正，總是認為聽得明白就算數。咬字不清的DJ都大受歡迎，社會接受絕對是一大關鍵，所以他深信部分字正音相信很快就消失，可惜但沒辦法。

（↓點擊圖片放大↓）

《愛回家》佳叔講波變演員 鍾志光演戲22年無放棄讀上碩士【下一頁】

鍾志光加入無綫已經30年，過往以半工讀完成學士和兩個碩士課程，他表示不會再讀，希望花時間好好享受人生。不少人認為他進修為了做演藝圈的安全網，萬一失業都夠學歷找到工作，但鍾志光並沒有想太多，只是隨喜歡的事就去做，「好多人話我有咁多時間可以去做YouTuber，可以搵多好多錢。不過，如果將成個人生放落搵錢，結果係點？買到間屋好大又如何？人都係瞓一張床嘅位置。」鍾志光以「小甜甜」龔如心和「光纖之父」高錕來做例子，多富有的人和多有才華的人，也有突然離開的一日，「人生變化無常，幾多豐功偉績都好，往後會突然一無所有，我真係睇化咗。所以生活隨遇而安，唔好強求咁多，反而得到嘅平安同開心遠勝一切。」對於人生的追求，鍾志光以電影《嚦咕嚦咕新年財》來做比喻，打麻雀就算摸到一手爛牌，就慢慢做好它，「唔通推牌走人咩？都要繼續打，咪慢慢打，睇吓點樣做靚副牌囉，人生都係一樣。」

{{hket:inline-image name="DSC05345.jpg"}}{{/hket:inline-image}}

責任編輯：楊安莉