近日曾志偉回歸無綫擔任高層，昨日無綫宣布星夢娛樂行政總裁何哲圖（Herman）於本月尾離巢，其妻余詠珊（Sandy）向來掌管綜藝節目，她亦被調任助理總經理（業務發展），志偉正式成為音樂及綜藝的揸fit人。昨午志偉受訪稱︰「我希望以音樂打破以往的界限和框架，還原香港音樂。」
昨日無綫發出內部通告，集團行政總裁李寶安宣布原任職無綫電視副總經理（節目及製作）的杜之克，職銜改為副總經理（戲劇製作及節目）；剛回歸擔任TVB副總經理的曾志偉，職銜改為副總經理（綜藝、音樂製作及節目），TVB的音樂業務亦由志偉負責。原本掌管無綫綜藝科的余詠珊，則改任助理總經理（業務發展），不再負責綜藝節目。此外，星夢娛樂行政總裁何哲圖將於本月28日離任。
志偉暗示撥亂反正
其實，自從無綫與四大唱片公司09年因版稅問題交惡後，《勁歌金曲頒獎典禮》近年已變為星夢歌手的自家派對，公信力及認受性大減，菊梓喬、胡鴻鈞等星夢幫每年成為頒獎禮大贏家，賽果為人詬病。至於無綫近年的綜藝節目吸引力也每況愈下，港姐、台慶等大騷亦缺乏話題，今次音樂及綜藝科的揸fit人大執位，相信會有一番新氣象。志偉昨日回應稱︰「剛收到公司通知，希望何哲圖在外邊會有更佳發展，而今次走馬上任，已正積極物色適合人才，打造更多元化的音樂節目，並希望以音樂打破以往的界限和框架，還原香港音樂。」至於余詠珊調職，志偉同樣希望對方勝任新崗位。
失勢的余詠珊昨午在電視城受訪，她說︰「Herman（何哲圖）會自己出去搞label，佢考慮咗兩、三個月！」她坦言近幾年花力氣發展新媒體如big big channel，自覺忽略本業︰「如果志偉返嚟可以做得更好，我非常樂意見到佢幫手，相信志偉可以帶動TVB嘅綜藝向前走！（感覺自己被削權？）權力係無乜意義，有權有義務，呢幾年工作量好大，依家有最好嘅人（志偉）返嚟對公司係好事。」近年余詠珊主理的綜藝節目被網民批評質素差，她回應︰「我已盡力，唔可以話TVB過去綜藝做得唔好，因為疫情好多綜藝都拍唔到，有嘢出街已經好難得！」
余詠珊嘆已盡力拍節目
至於一班星夢幫，鄭俊弘昨日回覆本報稱︰「好多謝Herman呢幾年對我喺音樂上嘅栽培。上年尾我同唱片公司嘅合約都完咗，嚟緊新一年我都有新嘅開始，新嘅嘗試。」去年加盟星夢的JW則大賣口乖︰「我好多謝TVB同Herman過去幾個月嘅照顧同支持，亦希望佢嚟緊個人音樂事業會發展得好好！我由細個開始已經好鍾意睇《超級無敵獎門人》同埋志偉哥嘅電影，所以對志偉哥好有信心，好似佢咁講，一齊進步，帶畀市民歡樂！」前星夢一姐吳若希說︰「Herman對我哋好好，多謝佢咁多年嘅照料。」至於周柏豪、連詩雅表示不回應。
撰文︰Steven、Pat
採訪：Pauline
美術︰梁政敏