陳家樂演海關挑戰記憶力

曾經憑18年熱播劇《逆緣》爺爺一角成功入屋的陳家樂，近日再參與無綫劇集《把關者們》的拍攝工作，飾演海關關員的他自言以往從未有機會接觸該政府部門，拍劇時要背熟不少條款，戲言「記性差啲都唔掂」！

《把關者們》以海關關員的故事作藍本，劇集日前已煞科。早前劇中眾演員包括陳家樂、袁偉豪、黃智雯等返將軍澳電視城拍攝宣傳海報，陳家樂難得跟眾人重聚，話題滔滔不絕，他說︰「劇集拍咗兩、三個月，前幾日終於煞科，好唔捨得，事關同一班演員由最初唔熟到打成一片嘅時候，劇集就煞科，趁拍海報再見面，大家又玩得好開心。」

做大哥哥引領年輕人

劇中飾演海關關員，家樂笑稱︰「正所謂『民生無小事』，原本以為加入海關，必定有好多大事要做，原來我只係負責一啲雞毛蒜皮嘅事，但係又乜都關我事，角色幾得意。」家樂拍攝劇集前，對海關工作的認識只是皮毛︰「之前唔熟海關工作，以為只係平時我哋出入境見到嘅嘢，原來佢哋要收集好多情報，加上幕後人員做好多資料搜集，令我開始了解呢個部門嘅工作性質原來好廣闊，又要背好多條款！（係咪好多NG？）好彩唔算多，試諗下我哋只需要跟劇本背熟一啲條款就得，現實中海關關員要背熟嘅條款仲多細節，真係記性差啲都唔掂！」

提到不少年輕演員參與該劇，現年36歲的家樂笑言合作過程愉快︰「我嘅角色分兩條綫，一條跟袁偉豪，佢就好似我嘅哥哥咁，帶領成班人，佢有一種懾人魅力，跟佢學到好多嘢；另一邊就輪到我做『哥哥』lead住20幾人，好有活力。」

採訪︰Pauline

美術︰梁政敏

攝影︰林良明（部分）