馬貫東 感恩靠《八時入席》發圍

馬貫東去年憑無綫劇集《那些我愛過的人》飾演患有亞氏保加症的醫生古希晨而廣為人識，他乘勢以六位數字投資湯包生意，在逆市下銷量增長，至今已慢慢回本，成功開拓新財路。他說︰「近日做緊慈善義賣，反應好踴躍，我哋每銷售一件產品，就送一份口罩畀社會有需要人士，善款捐去邊間機構就未有頭緒，但會收集意見。」提到憑《那》劇人氣爆升，馬貫東指去年是演藝生涯中進步很快的一年，他承諾今年也會繼續努力︰「希望疫情快啲完，呢一年經常提心吊膽，期望盡快推出疫苗截斷新冠肺炎病毒。」

馬貫東在剛拍畢的新劇《把關者們》中，飾演亦正亦邪的律師，他形容是新嘗試。回想入行十年，他透露曾經歷為事業作出抉擇的時候︰「好多謝珍姐（曾勵珍）帶我入《愛‧回家之八時入席》劇組，當時開始諗責任嘅問題，無理由因為自己嘅決定而辛苦到家人，喺意志最薄弱同想離開嘅時候，我演唐中書（十仔）一角令到團火番晒嚟，否則可能已經轉行！」