【聲明】港生活網站並無進行電話推廣活動

豬扒港姐變靚太 張嘉兒公開「瘦身神器」

發佈時間: 2021/02/22

一向包包面的港姐張嘉兒,出道時慘被網民封為「豬扒港姐」,想不到多年後,已成為兩女之母的嘉兒竟然愈變愈靚。難道有愛滋潤的女人真的特別美?嘉兒透露變靚「秘方」,原來是兩位囡囡成為了她的「消脂神器」,幫助她成功瘦身兼瘦面。

張嘉兒相隔3年再拍劇,在無綫新劇《陀槍師姐2021》中飾演宣萱閨密翁珠迪,與「威Sir」許紹雄演一對「老夫少妻」,擦出不少火花。已有一段時間沒拍劇,嘉兒坦言開工頭幾天非常緊張,對着鏡頭表現生硬,連早已背好的對白都忘記了,要用一些時間才能適應。她和宣萱今次已經是第二次合作,12年一起合作過電視劇《飛虎》,更因而成為好朋友︰「喺呢套劇入面係演佢表妹兼閨密,而現實中我哋都有見面食飯,所以,同佢一齊演戲佢無畀壓力我,壓力都係自己畀自己。」

老公主動陪練習床戲

《陀》劇中,嘉兒有一幕要色誘「老公」許紹雄,她說︰「事前無特別傾要點拍,不過,Benz哥(許紹雄)有提議我着件Tube,視覺上會逼真好多,咁我信佢嘅專業。我老公對我拍床戲又無介意,仲問要唔要同我練習下。」嘉兒同Benz哥首次合作,對方是前輩級,在對方眼中自己屬小妹妹,她坦言起初有一些緊張︰「我拍戲經驗唔夠多,仲要無拍咗幾年,驚自己表現生疏拖累大家收工,結果都拍得好順利,同埋劇入面個個演員都係好Nice,拍得好開心。」

劇集出街後,網民大讚嘉兒「靚咗好多」。回想07年嘉兒當選港姐冠軍後,慘被網民封為「豬扒港姐」,想不到十多年後,已成為兩女之母的她,反而變了「靚太」。對於一洗「豬扒」之名,她表示︰「主要係瘦咗好多,健康嘅瘦,上鏡係好睇好多,疫情前我一星期游兩、三次水,依家就會同老公跑步。其實兩個女幫我消耗最多體力,同佢哋落公園放電,我跟住佢哋後面跑、幫佢哋拎單車呀,陪佢哋玩幾個鐘,同做運動無分別。」

囡囡愛表演變身網紅

嘉兒說參選港姐時最肥120幾磅,生完BB後瘦了10多磅,她笑稱︰「可惜瘦得太遲。(成功平反?)我唔知呀,希望啲人唔好話我整容就得,因為我真係健康咁瘦,同埋做咗媽媽開心咗,可能都有關係。」

兩個囡囡Leora及Hannah,分別4歲和1歲,都很可愛,嘉兒也不時拍片上網分享親子生活。其中大女兒Leora眼仔碌碌,喜歡對着鏡頭講話,滔滔不絕表現自己,甚得網民歡心,嘉兒近日便特別為她開設網上頻道,讓她成為小小YouTuber。嘉兒指︰「無諗過啲網民咁鍾意佢,阿女係幾有表演慾,鍾意唱歌,語言能力都幾高,我會幫佢拍一啲益智嘅題材,好似做勞作、畫畫、唱吓歌咁,見阿女拍得好開心。」不過,這只會是Leora的其中一個興趣,嘉兒強調,以不影響她的功課為大前題。

撰文:衛紫敏

攝影:楊嘉傑

美術:梁政敏

豬扒港姐變靚太 張嘉兒公開「瘦身神器」

和丈夫Nathan育有兩女,張嘉兒不時於網上分享和女兒相處的點滴。(IG圖片)

豬扒港姐變靚太 張嘉兒公開「瘦身神器」

張嘉兒在圈中擁有不少好姊妹,(右起)有湯洛雯、朱千雪、岑杏賢及蔣家旻等。(IG圖片)

豬扒港姐變靚太 張嘉兒公開「瘦身神器」

在劇集《陀槍師姐2021》與許紹雄(右三)飾演老夫少妻,盧宛茵(右一)則演張嘉兒母親。(IG圖片)

豬扒港姐變靚太 張嘉兒公開「瘦身神器」

曾與過江龍金剛傳緋聞,不過張嘉兒強調只是美麗的誤會。