避談關智斌「新歡」 張敬軒︰睇完得啖笑

久未露面的張敬軒前晚出席銀行活動，有傳軒仔與好友關智斌（Kenny）關係生變，Kenny被指與靚仔董事Edwin頻頻見面，不時一同跑步。軒仔指傳聞「得啖笑」，強調自己與Kenny關係沒有轉淡：「我哋呢排成日傾電話！」

張敬軒前晚到九龍灣出席銀行理財活動，軒仔笑言已半年沒有現身公開場合，有恍如隔世的感覺。提到關智斌被爆有「新歡」Edwin，問軒仔最近有否跟Kenny聯絡？軒仔笑說：「早幾日先同Kenny喺公司飯局見過。」有沒有見過Edwin？軒仔說：「其實大家身邊咁多朋友，邊有可能全部都認識，娛樂新聞睇完得啖笑，最緊要大家生活愉快，身體健康！」

問到與Kenny關係是否轉淡？軒仔即反問：「何來轉淡？我哋有好多重關係，在公佢（Kenny）係同事，在私佢係出生入死嘅好戰友，我哋呢排成日傾電話，講下今年工作新發展，嚟緊我都會同佢一齊做下音樂。」

同「遮遮」鬥長命

另外，軒仔前日大爆家中外傭「遮遮」煲粥竟煮爆電飯煲，他講笑說近半年飲食主要有「洗腸」功效：「每日都食『遮遮』炮製嘅白粥同麵包，佢知道我笑佢，我以為係禮貌提醒，點知佢『變本加厲』，仲整壞我個煲，無諗過個煲比我更快『冧低』！」他笑言現在與『遮遮』鬥長命：「如果個煲有生命，應該會諗『阿蛇！我行先，你慢慢捱！』」不過，軒仔亦讚「遮遮」夠乾淨，除了廚藝外，其他方面值120分，兩人在生活上互補。此外，本身開設餐廳的軒仔，提到餐廳可以重開晚市，他說：「餐廳生意係有影響，好彩之前午市生意幾好，呢幾日開番晚市，都好多熟客支持。」

採訪︰Pauline

攝影︰林良明

美術：梁政敏