陳淑蘭
陳淑蘭

不裝安心出行私隱就安全了?

發佈時間: 2021/02/25

不裝安心出行私隱就安全了?

「安心出行」正式運作了,好多朋友都憂慮自己嘅私隱容易被竊取,連屋企個菲傭姐姐都問我係咪安全?我同佢講︰如果你以為「安心出行」會睇到你嘅私隱,咁你真係諗得太遲。

我哋生活喺呢個第四次工業革命中,特點係資訊及通訊科技突破同創新︰機械人技術、人工智能、物聯網同自動駕駛汽車或有更多創新科技等等,個人資料基本上已經承受緊風險。只要你每日享用緊呢啲優質科技,咁我真係勸你唔好太緊張呢個「安心出行」嘅私隱問題,因為相比起你日常生活所洩露嘅私隱,係小巫見大巫。

人工智能喺商業發展同應用所引起各種倫理道德方面嘅私隱問題,佢嘅廣泛同無處不在咁不斷收集個人資料,資料好多時喺當事人唔為意情況下被使用或轉移,所以分分鐘由外至內嘅資料同秘密,已經畀人攞嚟做緊數據。

當你上網睇某隻痔瘡膏資料,之後就有一連串關於痔瘡嘅用品、醫療等資料送上。當你去訂物流服務時,有無為意你個大名、地址同電話都貼喺包裝上。喺貨物未送到你手前,究竟有幾多人知道你嘅姓名、電話同住址?如果你有社交媒體,又鍾意執靚自己個樣先上載至社媒,呢個舉動已被人面識別軟件擁有咗你嘅身份。即係無事無犯法就平安大吉,否則喺人工智能嘅技術下,其實你已一覽無遺。

所以我有一個做國家高端科技嘅朋友,佢無社交平台,無智能手機,仲用緊2G電話,所以佢收唔到WhatsApp,我哋差唔多要飛鴿傳書畀佢。當我哋喺度笑佢之際,佢調轉頭笑番我哋無知,資料卻人人皆知。

喺咁嘅情況下,我哋可以做嘅係盡量唔畀壞人知道私隱而被偷取財產。如果真係徹底唔想畀人知道自己嘅私隱,你可能要搬去呢個島住,名叫「搵你唔到」!(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭