孖新抱影孕照 薛家燕被網民取笑似大肚

薛家燕在情人節當日，在社交網公布新抱陳素怡懷孕喜訊，快將榮升「家燕嫲嫲」的家燕姐，更與新抱一同影「孕照」，叫網民競猜誰大肚，但竟有一半網民搞笑猜測家燕姐「有咗」，令她笑個不停。

薛家燕前晚偕盛勁為等人錄影《流行經典50年》，家有喜事的家燕姐特別風騷，笑談得知快將抱孫的開心過程：「個仔（石耀庭）揀咗喺情人節公布，其實之前新抱整咗個蛋糕，叫我哋去食，點知我掛住食，無留意蛋糕上有一張超聲波相，珊珊（大女石祐珊）發現咗即刻大叫，我開心到放低蛋糕，攬住個仔同新抱，好興奮！」

家燕姐自爆得悉喜訊翌日，便立即向朋友請教補身湯水：「朋友好奇點解我要飲補湯，講笑問我係咪有咗，因為當時新抱大肚未夠三個月，於是我話自己補身。」她笑指日前將與新抱的合照放上網，竟有一半網民開玩笑估家燕姐懷孕：「因為我個肚腩仲大過新抱個孕肚，仲有我當年懷孕時係咁食，結果足足肥咗40磅！」

盛勁為提麥明詩即落閘

在《衝上雲霄大選》奪亞軍的前機師盛勁為，日前被拍得與緋聞女友麥明詩野餐，前晚盛勁為提到緋聞立即「落閘」，強調與麥明詩只是朋友，他說：「我睇唔到（與麥明詩發展）呢個可能性，佢係我做朋友嘅類型。」他坦言日後見麥明詩的時候會避忌一點：「我都估唔到嗰日會被偷拍，因為附近無乜人，都有啲驚訝。」

採訪︰Pauline

攝影︰林良明

美術：梁政敏