《失憶24小時》爛賭渣男上身 郭晉安︰阿女話我成日講大話

郭晉安（安仔）、譚俊彥主演的《失憶24小時》今晚播出第十集，雖然無綫未公布收視，但這齣輕鬆小品廣獲觀眾熱捧，各界激讚故事懸疑，劇情笑中有淚，而安仔亦成功表現出渣男神髓。昨午他接受《晴報》訪問時透露女兒亦有捧場︰「佢都話好好笑！」

貴為三屆視帝的安仔，在劇集播出前已信心十足，該劇自上周一播出以來，逐漸建立口碑，安仔飾演的茶餐廳侍應吳耀中市井又爛賭，經常大話冚大話，他與扮演失憶室內設計師蒙一言的譚俊彥，一個癲一個傻，這對拍檔輕鬆爆笑彈。對於劇集反應不錯，安仔受訪時認為劇本結構好，各演員有充分發揮空間︰「《失》劇用沉重嘅戲帶出輕鬆搞笑主題，只係劇集開播初段以悲劇方式表現出嚟。」劇中「渣男」上身的安仔，面對兒子秒速變慈父，日前播出的第七集中，他與兒子到美國領事館申請簽證，卻被揭曾經入獄，慘被蒙在鼓裏的愛兒無法接受，場面令人淚崩。對此安仔稱︰「我現實中都有個仔（郭令山），明白小朋友想做但無法做到會唔開心，所以投放出真實感情，當然自己現實生活中無坐過監！」

未諗第四度稱帝

問到安仔家人可有捧場，他透露細女郭以雅亦是《失》劇粉絲，對爸爸演戲時大話連篇感O嘴︰「阿女話齣劇好好笑，仲問我點解成日講大話！（王君馨被指演繹太嘈？）佢個角色應該係咁，演繹到港女感覺，處理得唔錯！」談到劇情發展，安仔指很多謎團會逐步解開，如王君馨失蹤、譚俊彥失憶期間做過甚麼等。此外，對於可望憑該劇第四次封視帝，安仔坦言未有多想，只期望有好收視。他又透露下周二將啟程往深圳，為《白色強人II》拍外景至四月尾，相信有排忙。

撰文︰Steven

美術︰梁政敏