回味蠔油的一點一滴

超市收銀員知我不懂煮飯，教我買一磚硬豆腐，然後切成一片片，放在油鑊加少少鹽，已好好味，再加少少蠔油就更加美味！廚房新貴最重要的法寶就是蠔油。

小時候暑假最開心是到外婆家小住。阿婆知道姊姊好鍾意食番茄醬，我好鍾意食蠔油，買畀我哋每人一支。嗰時年紀輕輕嘅我，已好似喺蘭桂坊嘅人一樣，手持一瓶至愛，好有型咁一面飲，一面跟朋友仔吹水。

怎料鄰居陳婆大驚小怪，緊張向外婆告狀︰「你兩個孫攞咗你廚房支蠔油，揸住支蠔油當汽水咁飲呀！」

外婆沒好氣地回應︰「係呀！我今日買咗兩支大號裝！」

陳婆很勞氣︰「你都癲嘅，太過縱容兩個孫女喇！」

外婆︰「佢哋開心就得喇！」

陳婆很惡咁望住我說︰「飲晒成支蠔油鹹死你呀！你以為好有益呀？」我又怎會捨得飲晒成支大號裝呢？

到今時今日，這個畫面我仍記憶猶新，當我入廚看到蠔油，就想起陳婆的𤷪𤺧樣。其實蠔油的確比汽水有益得多。老人家常叮囑︰「唔好飲咁多汽水呀！唔好飲咁多凍嘢呀！無益呀！」蠔油和茄醬都唔需要多，攝取少少已對人體有莫大裨益。請翻閱我的專欄文章「茄醬是抗癌妙品」。

咪以為蠔油無益，蠔油有很好的營養價值，蠔油是用蠔熬製而成的調味料。海產貝殼類含豐富鋅，蠔是含鋅量最高的，對人體免疫系統能正常發揮起重要作用。鋅是皮膚組織再生及修復的最佳物質，甚至可治療男性不育症。

總覺得以前蠔油味美得多，我懷疑現今蠔油究竟是否真的採用蠔提煉而成？隨着社會發達，現代科學取替傳統生產模式，很多替代品不一定更好。

舊時的東西總是特別有味道，包括鄰居也特別有人情味，記得一次外婆生病，陳婆、蘇婆、關婆都跑來幫外婆刮痧。左鄰右舍相互扶持和關懷的精神最叫我回味不已。（本欄逢周三、五刊登）