《東張西望》主持丨梁麗翹產後肥腫難分出鏡被嫌棄 無須運動節食靠「簡易生酮」修身

無綫《東張西望》主持梁麗翹（Nicole）2011年參選香港小姐後加入娛樂圈，17年下嫁金融才俊男友Nic，婚後二人育有一女Nanette。Nicole身材一向都好有睇頭，不過係2018年生完囡囡之後肥咗唔少，體重最高峰時更達160磅，為咗修身成功，Nicole不斷節食同做運動，但都徒勞無功，令佢非常困擾。

{{hket:inline-image name="42368263_925325704325176_2541497802420812414_n.jpg"}}{{/hket:inline-image}}

但噚日Nicole於YouTube上載影片，宣布減肥成功，並分享瘦身療法！Nicole透露當時佢產後復出主持節目，因為身形令到佢嘅自信心非常低落：「當時佗B嘅時候體重有170磅，諗住生完都可以瘦番20磅，但點知生完都仲有160磅。講真生完Nanette都幾慘，好似每日返工都好冇自信心，而且大家都覺得我好似好肥，而又有一啲負面嘅評語，會叫我不如休息下先，叫我瘦番先返工啦，又會話咁樣都係為你好，你喺鏡頭面前咁肥，咁樣只會害咗你自己。其實當時嗰個身形，係令到我有好多好多負面情緒。不過試咗簡易生酮飲食療法之後，用咗7個月時間，成功減到120磅，終於搵到希望。」

（↓點擊圖片放大↓）

佢指自己開呢個channel係想自己試過所有方法，成功先同大家分享，而佢喺減完呢7個月都冇反彈，Nicole話自己都好滿意。Nicole指如果要真正做到生酮飲食有好多嘢都要嚴格執行，所以佢就行「lazy」同「dirty」嘅生酮飲食。Nicole話「lazy」生酮飲食唔需要計住自己吸收咗幾多卡路里，只需要減少吸收碳水化合物同糖，所以佢都唔會食甜品同大部份水果，而且仲要戒酒。而「dirty」生酮飲食就係指佢仍然可以是但去一間餐廳，不過就要將食品自己「加加減減」，例如食漢堡包要走包皮，咁就去到邊都可以搵到自己想食嘅嘢！除咗生酮飲食，Nicole仲奉行168斷食，佢話用呢兩個方法減肥，唔使運動都唔使捱餓，所以好想畀多啲人認識呢個減肥方法！