陳淑蘭
陳淑蘭

從步姿看一個人性格

發佈時間: 2021/03/04

從步姿看一個人性格

內地演員周一圍喺《上陽賦》飾演勇武大王,演技出神入化,連行路都入型入格!每一步路都散發着一個英雄好漢必有嘅氣勢。你可能質疑我,行步路啫,使唔使誇到咁大?其實每個人都有專屬嘅反射動作,無論拍手、跺腳或行路都有自己嘅style。喺日常生活中嘅細節都藏着奧妙,即係行路嘅姿態有機會睇出一個人嘅性格。

步履平穩型︰屬於現實主義者,精明而穩健,唔輕易信人,但守信諾,係可依賴嘅人。

上身微傾型︰呢啲人多數個性平和內向,謙虛含蓄,佢哋同人相處時,表面沉默寡言但極重情誼。

步履急促型︰無論有無急事,呢類人總係來去匆匆,佢哋性格特點係遇事唔推卸責任,精力充沛,喜歡接受各種挑戰。

昂首闊步型︰這種人往往以自我為中心,對人有點淡漠,但思路敏捷,做事有條不紊,富組織能力。

款款搖曳型︰此類多為女性,坦誠熱情,心地善良,喺社交場合永遠係中心人物,極受歡迎。

步履整齊、雙手規則擺動型︰呢種人性格剛毅,意志堅強,有較強組織能力,但偏於獨斷專行。

走路蛇行型︰「蛇行」係相學上嘅術語,意即行路時有如蛇蠕動而行(腰板無力,身體左搖右擺),咁樣行路嘅人,性格有機會屬於口是心非、工於心計,同呢種人打交道必須萬分謹慎。

肢不着地型︰即係行起路上嚟腳不着地,顯得輕浮無勁。呢類型嘅人性格做事唔紮實,總係草草了事,經常虎頭蛇尾,令自己信用掃地。

所以喺相學中,除咗面相同手相外,體相、德相、行為相和行路相,都係相學中嘅一個分支考究。所以我行路會借鏡小露寶,佢性格雖然大懵烏龍但永遠逢凶化吉!所以一於要︰大踏步神情確威武,小子大名露寶,人人皆知道。小露寶嚟啦,學小露寶好嘢!(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭