捐OK便利店e印仔做善事 冀助4機構籌10萬

黛安經常去便利店買嘢儲印花，原來除咗換禮品有折扣，仲可以幫人。OK便利店公關姊妹同黛安講，見到疫情下慈善機構好難搞籌款活動，於是決定即日起喺「OK齊齊印／OK Stamp IT」App，加入「捐贈e印仔」計劃。顧客只要喺程式揀選心儀嘅機構，每捐出1個e印仔，OK便利店就會代捐$0.5畀相關機構；今次受惠機構包括膳心連基金、香港願望成真基金、保護遺棄動物協會及救世軍，目標係幫佢哋籌$10萬。

捐e印仔嘅流程非常簡單，唔使10秒就幫到有需要嘅人，而且今次受惠嘅階層好廣泛，除咗小朋友同長者外，連小動物都無忽略，真係好有心。姊妹話，希望今次捐e印仔可以產生漣漪效應，令更多企業同有心人加入幫手，繼續將快樂同愛傳開去。