百佳 ╳ 女青「關愛長者食物券」 擴至14區受惠

疫情下大家生活都受影響，黛安收到風，百佳同香港基督教女青年會（女青）多年來推行嘅「關愛長者食物券」計劃，今年起擴大計劃規模，覆蓋地區新增大澳同東涌區、九龍城區、北區及元朗區，令受惠地區增至14個，希望幫到更多老友記！

公關姊妹話，除咗擴大受惠範圍，仲會將食物券換領日期由2個月延長至3個月，等長者去換領食物更有彈性。女青將評估服務對象嘅需要，並代百佳分別喺本月、6月、9月及12月向每區450位長者，每人派一套總值約$150嘅長者食物券，等佢哋憑券到區內指定百佳分店免費換領8款食品及日用品，預計有1,800位長者受惠。此外，百佳會由即日至下月7日，喺全綫百佳分店收銀處擺設捐款箱，為女青籌集善款，等佢哋可以幫助更多人。