聞UA結業感心酸 洪金寶慨嘆人生無希望

洪金寶昨日偕太太高麗虹到元朗鄧氏宗祠出席電影《邊緣行者》開鏡儀式，早前盛傳身體不適的他，昨日所見精神飽滿，中氣十足，撑拐杖行路仍然敏捷。對於電影業蕭條，洪金寶慨嘆香港人拍香港電影，不知何時會完結；對於百姓生活困苦，他也非常感觸，坦言只能幫手流淚。

洪金寶昨日與任達華、任賢齊等出席開鏡儀式，現年69歲的洪金寶戴上防疫透明面罩現身，之前為健康成功減磅的他，依然保持招牌大肚腩。已兩年無拍戲的他說：「呢排日日休息，都休息咗年幾兩年。梗係拍戲開心啲，雖然今次係客串，但香港電影有嘢繼續做，絕對開心，香港人拍香港電影，都唔知幾時會停。」

洪金寶坦言得悉UA院綫結業，十分感慨︰「可能遲啲發行公司、戲院倒閉，連電影、電視都無得睇，要聽番電台，遲啲香港乜都復古。（對UA結業好欷歔？）梗係，我以前成日行戲院，每個星期六、日就去戲院睇觀眾反應，同埋睇自己同老死麥嘉嘅戲，依家都無呢支歌仔唱。」

任賢齊太入戲要搬走

身為影壇大哥大，洪金寶十分佩服香港的電影公司在疫情下仍然開戲，問他會否減片酬以支持本地同業？他笑稱︰「如果係香港政府就唔減，政府大把錢，如果係同業就有得商量。（希望政府對電影業更多資助？）唔講呢啲，人生無希望，唯一希望係香港仲有啲空氣呼吸下，遲啲連空氣都無！睇新聞見到啲老百姓生活情況，好心酸，我好想幫，但我幫唔到咁多，唯一可以幫佢哋流眼淚！」

同場的任達華與任賢齊在戲中飾演社團中人，小齊大讚任達華十分照顧眾人。提到角色亦正亦邪，小齊為免將角色情緒帶回家，決定另租地方暫住：「出得嚟行預咗要還，之前試過拍戲時將情緒帶番屋企，成個人兇神惡煞，所以都係搬出去住。」此外，提到台灣歌手陳昇證實患口腔癌，小齊說︰「我有問候佢，佢情緒ok，希望大家健康平安。」

採訪︰Pauline

攝影︰林良明