劉俊謙首次吊威也嗌緊張

憑ViuTV劇集《二月廿九》及電影《幻愛》成為新一代男神的劉俊謙，最近擔任家品店全新食品系列代言人。他日前拍攝廣告時，竟獻出拍電影從未試過的第一次：吊威也。劉俊謙笑言拍攝前一晚仍未懂得緊張：「我反而有啲興奮！不過去到現場準備，就開始緊張了。」因為廣告要表達「慢活人生」的概念，所以他被吊上半空時，需要表現出輕鬆感覺：「吊威也嗰陣要多角度拍攝，我都要跟住鏡頭調整身體角度，雖然有啲困難，不過好開心！」

高大靚仔的劉俊謙自認是個浪漫的人，他說：「人生最重要係感受自己、感受生活，搵到自己真正鐘意嘅嘢。」相信他平日對住女友蔡思韵時，亦不時製造驚喜。