《克服他她它》最怕冇錢︳古明華尊嚴事小只怕家人被睇低「生活幾苦都唔好欠人錢！」

古明華（古佬）為ViuTV節目《克服他她它》擔任嘉賓，古佬最想克服原來是「怕冇錢」！節目入面，古佬向主持人火火分享自己怕冇錢的程度，「因為怕冇錢，所以會處於唔敢亂使錢嘅狀態。咁冇錢搵，就怕冇錢啦，但搵到錢時，又會驚好快冇錢，而唔敢用錢，尤其係當冇收入嘅時候！」

{{hket:inline-image name="26.jpg"}}{{/hket:inline-image}}

古明華話最想克服「冇錢嘅恐懼」。（圖片：電視截圖）

{{hket:inline-image name="27.jpg"}}{{/hket:inline-image}}

主持火火能否成功幫古明華克服恐懼？（圖片：電視截圖）

【中佬再出發】古明華敖嘉年環境改變不了初心 「時間會帶你度過所有難關」 【下一頁】

古明華於2020年1月離開工作26年的無綫，外闖搵真銀卻遇上全球疫情，工作量不足，收入大減，古佬表示：「由去年1月開始，差唔多11個月冇收入，所以，當你哋問我怕乜嘢時，『怕冇錢』！成個社會經濟冧嘅時候，好多人冇工開，但你仲有好多必須支出，好似供樓咁，都要食，都要繼續生活，病都要睇醫生啦！呢啲都係壓力。」

缺錢自然欠安全感，古佬想到患病的女兒，邊講邊雙眼通紅，「阿女出世已經有病，但佢運動好叻，跑得好快！細個時加入港隊武術隊，阿女對呢樣嘢係好自豪，點知喺佢10、11歲病發 (患上腎小球炎)，要不斷食類固醇，對骨骼、骨質有影響 ; 到12歲時，港隊話佢冇得留低嘞……作為一個『無能』嘅父親冇嘢可以做到，好無助。只可以同阿女講呢個係你嘅命運，你必須克服佢，佢亦好叻，鍛煉咗好強嘅心態去面對。」

(點擊圖片放大)

古明華亦自爆兩度出入醫院，「第一次係肺病，第二次係膽穿咗發炎，醫生話幸好早發現，如果啲細菌流咗出嚟就會變腹膜炎，咁就要bye bye……好多人都係咁走咗。另外，又發現患上糖尿病，呢個係慢性病，令人好煎熬，自己諗點解個天要咁？分開嚟搞我啦，唔好一次過嚟搞，咁好大鑊㗎！其實我嘅尊嚴唔重要，我老婆、阿女、屋企人，佢哋嘅尊嚴係我重視嘅……佢哋唔好覺得被人睇小，唔好覺得佢哋個老公、爸爸冇用就得嘞！」

節目內其中一個環節，古佬一日只能用50元，他自爆：「我呢對鞋平過搭地鐵，對鞋喺網上買$14.9兩對，衫同褲加埋都係$27.8，如果大家用金錢去衡量物質咁當然呢啲衫褲係好cheap啦！但如果你唔講畀人知，咁打扮又著得舒適嘅，我覺得ok喎！」古佬說慳慳地都可以過活，唯一是不要欠人家錢，「就算幾困苦都好，唔好欠人錢，你朋友都會遇到困難嘛，所以我人生態度就係儘量唔好欠人錢、儘量唔好靠朋友，雖然好多朋友會話『你有乜問題要搵我呀』，但都係唔好嘞！」

最後製作組竟然「先斬後奏」，問古佬「8折收嘉賓出鏡費有冇問題？」，其實是測試他是否「錢大個天」？當古佬聽到工作人員要求「減人工」，表現好客氣，亦接受減價，但有少少不滿安排，「下次早啲同我講好啲，我都會做，但你哋拍咗先同我講，咁就唔係咁好嘞，明唔明？」製作組說沒想過他肯減酬勞，古佬說：「明白大家都會有困難嘛，冇所謂，坦白講就得。如果你話1折畀封利是算，咁梗係唔好啦！」

(點擊圖片放大)

撰文：衛紫敏

《愛回家》劇情狂插入政府資訊觀眾吃不消 連林秀怡客串角色都叫「易苗」【下一頁】