【聲明】港生活網站並無進行電話推廣活動

自覺扮相靚仔 張敬軒恨拍古裝劇

發佈時間: 2021/03/10

無綫近來銳意革新音樂節目,張敬軒昨日亮相《勁歌金曲》錄影,TVB高層樂易玲及星夢CEO何麗全亦親臨錄影廠,相當重視。軒仔已一年多沒有上《勁歌》,又笑言甚有興趣拍古裝劇,不過卻擔心要吊威也。

張敬軒昨日錄影《勁歌》,一月時推出新碟的他說:「其實我都希望今年放多啲時間喺唱片方面,之前經歷咗疫情,大家都需要音樂療癒。」軒仔最開心可以自由亮相兩個電視台的音樂節目:「時代唔同咗,要打開新局面,正如我間餐廳、婚紗店同錄音室,都要成行成市,百花齊放先有得做。」

問軒仔會否爭取唱無綫劇集主題曲?他笑言視乎監製是否需要自己:「我唱過《盛世仁傑》主題曲㗎!拍劇方面,我都客串過《四葉草》。」他笑言自覺古裝扮相不俗,所以有興趣拍古裝劇:「不過我驚要吊威也,以前試過拍廣告要吊威也,吊足十個鐘,身上個個部位都痛,擔心影響身體機能呀!(驚黐頭套甩頭髮?)咁我又未試過,我曾經諗過試下黐頭套睇下自己係咩樣。」

慰問容祖兒傷勢

另外,提到容祖兒手部受傷縫針,軒仔指祖兒受傷後已立刻在群組報告:「睇到都戥祖兒痛,佢不嬲做嘢好投入,但生活上就粗心大意。我有叫北京嘅同事幫手買去疤膏,我都有慰問佢,不過佢依家參加緊內地比賽(《乘風破浪的姐姐2》),唔想畀壓力佢,佢最快都要四月先返到嚟。」

採訪︰Pauline

攝影︰林良明

美術:梁政敏

自覺扮相靚仔 張敬軒恨拍古裝劇

星夢新任CEO何麗全(左)及樂易玲特地到錄影廠探軒仔班。